Syrdarııa syr bermedi

Burnaǵy kúni Qyzylorda oblysynyń ákimi Qyrymbek Kósherbaevtyń tóraǵa­lyǵymen qala jáne aýdan ákimderiniń keńeı­tilgen májilisi ótti. Jıynda oblys ákimi apparaty basshysynyń orynbasary Rýslan Ormaǵambetov sý tasqyny kezeńiniń ótý qorytyndysy jóninde baıandady. Aqpan aıynyń sońyna qaraı Shardara sý qoımasynan sekýndyna 1050 tekshe metr sý kelip turdy. Bul jaǵdaı seń júrý kezinde birshama qıyndyqtardyń týyndaýyna áser etti. Degenmen, judyryqtaı jumylýdyń arqasynda seń oblys aýmaǵynan esh qaýip týdyrmaı ótti. Áıtkenmen, kútpegen oqıǵanyń Jańaqorǵan aýdanynda oryn alǵanyn aıta ketken abzal. «Negizi Syrdarııa ózeninen qaýiptendik. Bıyl jaýyn-shashyn kóp boldy. Seńniń Syrdyń arnasyn jyrmaǵany eseli eńbektiń óteýi. Al Qarataýdan aqqan qarǵyn sýdyń saldarynan zardap shekken turǵyndarǵa sol mezette kómek bolatynyn jetkizgen edim. Shyǵyn 29 mıllıon teńgeniń shamasy eken. Bul tolyǵymen óteledi», – dedi Qyrymbek Eleýuly. Sondaı-aq, óńir basshysy keler jyldyń qamyn búginnen oılastyrý qajettigin eskertip, Syrdarııa ózeniniń boıyndaǵy qaýipti degen aımaqtardyń bógetterin qalpyna keltirýge osy bastan kirisýdi tapsyrdy. Erjan BAITILES, «Egemen Qazaqstan». QYZYLORDA.