Altyn qoldy Akopıan

О́mir jaıly toqtaýsyz tolǵam jasaýǵa bolady. Áıtkenmen, onyń mánin bir túıinge toptastyrǵan da eshkim joq. Másele – ómir súre bilýde. Tirshiliktiń osynaý qarapaıym da qasıetti zańdylyǵyn teń ustaǵan azamattar barshylyq aramyzda. Solardyń biri dáriger – Aırık Akopıan. «Tirshiliktiń tutqasy adal eńbekte», deıdi ol. Qaǵıdatqa beriktigin ómir boıy dáleldep te keledi. Jurtshylyqtyń jyly lebizi jelpintkeni shy­ǵar, aldymen Aırık An­dro­nıkovıch jaıly keń kósilip jazsaq degen oı bolǵan. Asa qulshyna qoımady. Qo­lyma Arekeńdi jýyr­daǵy jetpis jasymen qut­tyqtaǵan ujymynyń lebiz hatyn ustatty. Maq­­taý-madaqtaýǵa da jutań­daýmyz ǵoı. Dári­ger­lerdiń minezimen qysqa qaıy­ry­lypty. Biraq, «Altyn qoldy azamat!» degen sóz bar eken. Bul kásibı otashynyń qyz­metin bilikti mamandar moıyndaǵan joǵary baǵa ekendigi daýsyz. Eńbegimen elge elendi degenińiz osy. Aırık Akopıan Erevan medısınalyq ınstıtýtyn bitirisimen eńbek jolyn Kókshetaý (qazirgi Aqmola) oblystyq aýrýhanasynda bastaǵan. Mine, oǵan da 47 jyldan asyp barady. Búgingi kúni de abyroıly sapta. Jo­ǵary dárejeli mamannyń kásibı jolyn ol atqarǵan 40 myńnan astam otamen, oblysty bylaı qoıyp, ózge aımaqtardan ádeıi izdep kelgen adamdardy qabyldaýlarymen, úmit otyn ushqyndatqan keńesterimen baılanystyrýǵa bolady. Arekeń bilikti otashy mamandardyń birneshe býynyn tár­bıe­ledi. Olar qazirgi kez­de Qazaqstan Res­pýb­lıkasynyń túk­pir-túk­pi­rinde, Reseı­de, Be­lo­rýs­sııada, Ázer­baı­janda, tipti, Ger­ma­nııada, AQSh-ta, Kanada men Izraılde jemisti eńbek etýde. Altyn qoldy azamat 1995 jyly Aqmola ob­lystyq aýrýhanasynda, respýblıkamyzda alǵash­qylardyń biri bolyp laparoskopııalyq ota jasady. Osy aralyqta tórt myńnan astam naý­qas­qa dárigerlik kómek kórse­tilip, talaı úıdiń qýanysh shamy jar­qy­rady. Atalǵan eńbekteriniń negizinde Aırık Andronıkovıch 1999 jyly medısına ǵylym­darynyń kandıdaty ǵylymı ataǵyn qorǵady. Únemi izdenis ústindegi jannyń izgilik jolyndaǵy eńbekteri de eskerýsiz qalǵan joq. Ol «KSRO densaýlyq saqtaý isiniń úzdigi», «Qazaqstan Respýblıkasy densaýlyq saqtaý isiniń úzdigi» ataqtarynyń ıegeri jáne Elbasy Nursultan Nazarbaevtyń Alǵys hatymen marapattalǵan. Buǵan qosa bizdiń qadirli dáriger óziniń elimizge tanymal shákirtterimen maqtanady, keseline shıpa tapqan myńdaǵan adamdarmen birge qýanady. – Meniń eńbek kitapshamda bir ǵana jazý bar, – deıdi ol. Onyń basty sebebi, Qazaqstandaǵy turaqtylyqta, san túrli ult pen ulys ókilderiniń beıbit qatar tirshilik keshýinde, ózińniń de, bala-shaǵańnyń da bolashaqqa alańsyz qadam basýynda. Elbasymyz óziniń kóregen saıasaty arqyly Qazaqstan halqy Assambleıasyn barshamyzdyń oı-pikirlerimizdiń júzege asýyna, aldaǵy kúnderge jaqsy jospar qurýymyzǵa múmkindik jasaý ordasyna aınaldyrdy. Biz qazaq halqyna osy úshin de qaryzdarmyz. Baqbergen AMALBEK, «Egemen Qazaqstan». Aqmola oblysy.