«Qudaıkóldiń ákimi nemis bala...»

Ekibastuzdyń Qudaıkól aýylynyń ákimi Nıkolaı Vınspen biz sol aýylǵa barǵanda tanystyq. Jap-jas jigit, 30-ǵa da tolmaǵan eken. Reseı jaǵynan oqý bitirip kelipti. Bul – bizdiń kóptegen ul-qyzdarymyzǵa úlgi bolyp kele jatqan «Dıplommen – aýylǵa!» degen baǵdarlamanyń nátıjesi bolsa kerek. Ekibastuzda týyp-ósken Nıkolaı mektepten soń, Novosıbır Gýmanıtarlyq akademııa­syn bitiripti. О́ndiristi qaladaǵy jastardyń basyn qosyp, «Báıterek» atty qoǵamdyq jastar birlestiginde mádenı sharalardyń bastamashysy, qoldaýshy-volonter retinde jumys jasapty. Belsendi jumystary arqasynda kózge túsken balań jigit 2006 jyly osy birlestik basshysynyń orynbasary bolady. Osy ýaqyt aralyǵynda «Báıterektiń» qoldaýymen qala jastaryn jumysqa tartý bırjasy arqyly 2 myńǵa jýyq jas jumysqa ornalasady. Áleýmettik turǵyda serpin beretin sharalar ótkizý arqyly jastarǵa jaqsy qoldaý kórsetildi. Al, 2008 jyly N. Vıns «Báıterektiń» basshysy bolyp saılanady. Sol kezderi «Nur Otannyń» «Jas Otan» jastar qanaty «Innovasııalyq lager» baǵdarlamalar júıesi boıynsha brıfıngter ótkizip júrdi. Bul «Jastar – Otanǵa» baǵdarlamasy jastardyń ınnovasııalyq daryn-qabiletterin baıqaýǵa arnalǵan edi. N.Vıns 2012 jyly «Jas Otan» sezine delegat bolyp qatysty. Onyń ulty nemis. Ákesi Andreı, sheshesi Tatıana, ápkesi Marına barlyǵy da jeke kásipkerlikpen aınalysady. Baýyry Sergeı stýdent. Vınster áýletiniń úlken atalary 1925 jylǵy qýǵyn-súrginge túsken nemis ultynyń ókili, 1942-45 jyldary Qaraǵandy jaqta eńbek armııasynda bolypty. Al búgingi Vınster áýleti qazaq jerin Otanymyz, elimiz dep taǵdyrlaryn osy jerge baılapty. «Ekibastuz biz úshin jer jánnaty, súıikti qalamyz, biz qazaqstandyqtarmyz», –deıdi Vınster. Muny kishkentaıynan estip ósken Nıkolaıdyń óz eliniń, týǵan qalasynyń patrıoty atanýy da sondyqtan bolsa kerek. Erjetken soń qatarlastarynyń arasynan oza shyǵyp, kóshbasshy-lıderlik qabilet-darynyn baıqatyp úlgerdi. – Aýylǵa qalaı ákim bolyp júrsiń? – dep surap jatyrmyz. – Aýyl maǵan tańsyq emes. Qazir jos­par-jobalarym kóp. Qudaıkól aýmaǵyna qarasty Qarasor aýyly bar. О́ndiristi aýyldar. Ken baıytý kombınaty jumys jasaıdy. Aýyldyqtar úshin jumys bar. Jaqsy ómir qalada ǵana emes qoı, kerisinshe, aýyldan jumys bastap, ómir kórgen jaqsy dep oılaımyn. Shyńdalasyń, tájirıbe jınaqtaısyń. Men buǵan deıin Ekibastuzdyń Álkeı Marǵulan atyndaǵy aýylynda aýyldyq ákim­dikte bas maman bolyp qyzmet ettim. Bas maman bola júrip, «Ekibastuz óńirindegi agrokeshenderdiń damýy jaıly» degen taqyrypta baǵdarlama jazyp, arnaıy sertıfıkat aldym. Qudaıkólge ákim bolǵanǵa deıin bul aýylda da bas maman boldym. Al ótken jyldyń tamyz aıynda osy aýylǵa ákim bolyp saılandym. Aýyldyqtar, oralman aǵaıyndar bar, bárimen qazaq tilinde azdap sóılese bastadym, jalpy, qazaqshany jaqsy túsinemin. Qasymda ákimdiktiń bas mamany Aqan Seıilhanov aǵamyz bar, áli-aq qazaqshany jaqsylap úırenip alamyn dep oılaımyn. Bastysy – aýyldyń áleýmettik jaǵdaıyn qolǵa alyp, ár úıge sý keltirý, jol jóndeý mindet. Aýyldyń kúndelikti tynys-tirshiligi kóp, – deıdi N.Vıns. – О́ziń áli úılenbepsiń de. Kelindi osy Qudaıkólden alsań qaıtedi? – deımiz ázildeı. – Bolsa, solaı da bolyp qalar, toıǵa shaqyramyn ǵoı, – deıdi kúlip ol da. Biz jastyq jigermen aýylǵa kelip, ákimdik qyz­metke aralasqan Nıko­laımen qoshtastyq. Jalpy, ekibastuzdyqtar Qudaıkól aýyly jaıly suraı qalsań, «Á, onda qazir nemis bala ákim bolyp júr», dep qol­dap, tilektestik bildirip jatady. Biz de N.Vınske iske sát, Qudaıkóldiń ákimi deımiz. Farıda BYQAI, «Egemen Qazaqstan». Pavlodar oblysy, Ekibastuz qalasy.