Osyǵan oraı Aqparat jáne qoǵamdyq damý mınıstri Asqar Omarov «Groupe M6» kompanııasynyń telearnalar men radıostansııalar portfelin halyqaralyq dıstrıbýsııalaý jónindegi dırektory Jan-Rene Okýtıýre jáne «Ltı Vostok» Halyqaralyq dıstrıbýsııa jónindegi bas dırektory Marııa Jabına-Pantelık jáne Qazaqstan Respýblıkasyndaǵy Fransýz Respýblıkasy Elshiliginiń mádenıet jáne yntymaqtastyq máseleleri jónindegi keńesshisi Aleks Bortolanmen kezdesti. Kezdesý barysynda taraptar balalar úshin qaýipsiz aqparatty qamtamasyz etýdiń mańyzdylyǵyna toqtaldy.
Sarapshylardyń aıtýynsha, aldyn ala júrgizilgen zertteýler men saýalnamalar nátıjesinde qazaqstandyq balalardyń otandyq ónimnen basqa, ásirese osy TiJi arnasynyń ónimin kóbirek kóretinin kórsetken. Aýdarma jumystary ótken jyly bastalyp, 70 saǵattyq teleónim memlekettik tilde dýblıajdaldy. Esterińizge sala keteıik, bul jobanyń júzege asyrylýyna 2021 jyly Aıda Balaeva bastamashylyq etken bolatyn.
Memleket basshysy Qasym-Jomart Toqaevtyń 2022 jyldy «Balalar jyly» dep jarııalaǵanyn atap ótken Asqar Omarov qazirgi aqparattyq ǵasyrda balalardyń qarym-qatynas ortasyn qalyptastyrýda mýltfılmderdiń yqpaly zor ekenin atap ótti. «Mınıstrlik álemge tanymal mýltıplıkasııalyq balalar arnalaryn qazaq tiline aýdarý boıynsha aýqymdy jobany iske asyrýda. Bul balalardyń memlekettik tilge degen qyzyǵýshylyǵyn arttyrýǵa, sondaı-aq óskeleń urpaqty tárbıeleýge septigin tıgizetinine senimdimin», dedi mınıstr.
Kezdesý barysynda jýrnalısterdiń biliktiligin arttyrý, anımasııa óndirisi jáne mınıstrlik jetekshilik etetin basqa da salalar boıynsha ekijaqty yntymaqtastyqty damytý perspektıvalary talqylandy.
Aıta ketý kerek, balalar televızııalyq kontentin óndirýshilerdi tańdaý kezinde balalar telearnalarynyń osyndaı jobalardy iske asyrýdaǵy tájirıbesi jáne habar taratý tilderiniń sany eskerildi. Máselen, TiJi arnasynyń 20 elde 14 túrli tilde habar taratý tájirıbesi bar. Telearnanyń negizgi mıssııasy 2-den 7 jasqa deıingi balalar úshin qaýipsiz aqparattyq keńistikti qamtamasyz etý bolyp sanalady.
«Qazaq tili – óte baı til. Osy tildi keńinen nasıhattaý maqsatynda qazaqstandyq balalar úshin arna qurýdy qolǵa aldyq. Qazaq balalaryna olardyń memlekettik tiliniń damýyna yqpal etetin oıyn-saýyq jáne bilim berý kontentin qalyptastyrýdy maqsat tutqan birlesken bul joba – bizdi osynaý ıgi iske yntalandyrdy», dep atap ótti Jan-Rene Okýtıýre.
Qazirgi tańda qazaq tilindegi TiJi aýdıojolaǵy Alma TV, TV Commerce, Qazaqtelekom, Fermata PRK, Qaınar Medıa (Taldyqorǵan qalasy), Teralaın (Nur-Sultan qalasy), TTK (Temirtaý qalasy) sekildi operatorlarda qoljetimdi.
