Aýdan ortalyǵyndaǵy mádenıet úıiniń alańynda qaz-qatar kıiz úıler tigilip, esik aldynda jas kelinder samaýryn qoıdy. Shaı qaınaǵansha, shyryldaǵan maıǵa baýyrsaq pisiristi. Oblystyq baıqaýǵa alǵash ret qatysyp otyrǵan Anjelıka qazaqtyń salt-dástúri oǵan tańsyq emes ekendigin aıtady. Ol eki jyl buryn qazaq otbasyna kelin bolyp túsipti.
– Alǵashqy kúnderi qazaqtyń ádet-ǵuryptary maǵan tanys emes edi. Ýaqyt óte, kóp dúnıeni úırendim. Qazir qamyr ıleý, nan jaıý, baýyrsaq, shelpek pisirý – kúndelikti jumysym. Búgingi saıysqa jubaıym,10 aılyq qyzym qoldaý kórsetip, kelip otyr, – deıdi О́skemen qalasynan kelgen qatysýshy Anjelıka Shabdanbekova.
Baıqaýǵa oblystyń ár aýdanynan kelgen 16 kelin qatysty. Kóńildi is-sharanyń kórermenderi alǵashqy bólimde «Jas kelinniń bir kúni» atty beınerolıkti tamashalady. Munda kelinder ózderiniń bir kúndik tynys-tirshilikterin túsirgen edi. Odan keıingi «As – adamnyń arqaýy» kezeńinde ulttyq taǵamdar ázirlep, umytylyp bara jatqan as túrlerin usyndy. Olardyń daıyndalý joldaryn túsindirdi. Intellektýaldyq bólimde qazaq halqynyń salt-dástúrleri, ádet-ǵuryptary tóńiregindegi suraqtarǵa jaýap berdi. Al shyǵarmashylyq saıysta biri án aıtty, biri bı bıledi, endi biri mánerlep óleń oqydy... Eń sońǵy «Aq oramal» bóliminde ár ult ókiliniń qatysýshysy kelinniń basyna baılaıtyn oramaldyń shyǵý tarıhy, ereksheligi, oramaldy taǵý mádenıeti týraly egjeı-tegjeıli aıtyp berdi.
Saıystyń negizin qalaǵan Araılym Esimbekovanyń aıtýynsha, dástúrli túrde ótip kele jatqan «Aıaýly jas kelin» baıqaýy Dostyq úıiniń 30 jyldyǵyna oraılastyra uıymdastyryldy.
– Buǵan deıin tek qazaq qyzdary qatysyp kelgen baıqaýdyń aýqymy keńeıip, ózge ult ókilderi de qatysýǵa nıet bildirdi. Endi biz basqa etnostardyń salt-dástúrlerimen jáne erekshelikterimen tanysýǵa múmkindik aldyq, – deıdi A.Esimbekqyzy.
Sóıtip jas kelinderdiń aqyly men parasaty synǵa túsken baıqaý óz máresine jetip, jeńimpazdar anyqtaldy. «Aıaýly jas kelin» baıqaýynda úshinshi oryndy О́skemenniń atynan synǵa túsken Anjelıka Shabdanbekova ıelense, ekinshi oryn Glýbokoe aýdanynan Ajar Tóleýqanova men rıdderlik Ardaq Maltaevaǵa buıyrdy. Bas júldeni sonaý Abaı aýdanynan kelgen Aıdana Baıtósova jeńip aldy. Qatysýshylardyń barlyǵy alǵyshattarmen, júldegerler baǵaly syılyqtarmen marapattaldy.
Shyǵys Qazaqstan oblysy,
Glýbokoe aýdany
