Sport • 20 Mamyr, 2022

Qazaqstandyqtar sýperfınalda baq synaıdy

Mamyr aıynyń 20-22-si kúnderi Grekııa astanasy – Afınada sý sportynan ártistik júzýden Álem kýbogynyń sýperfınaly ótedi. «Spıros Lýıs» sý sporty ortalyǵynda álem myqtylary sheberlik baıqasatyn úzdikter qatarynda Qazaqstan quramasynyń ókilderi de bar.

Álı BITО́RE

Mádenıet jáne sport mınıstrligine qarasty Sportty damytý dıreksııasynyń málimeti boıynsha, Álem kýbogynda el namysyn Nargıza Bolatova, Aıgerim Qurmanǵalıeva, Karına Abdýlına, Ksenııa Makarova, Eterı Kakýtııa, Anna Pavlesova, Iýlııa Rogaleva, Valerııa Stolbýnova, Jaklın Iаkımova, Jánııa Jıenǵazy, Arına Pýshkına, Iаsmın Tuıaqova, Karına Magrýpova, Darına Valıýllına, Edýard Kım qorǵaıdy. Ulttyq quramanyń bas bapkeri – Álııa Karımova.

Aıta keteıik, FINA-nyń ártistik júzýden Álemdik serııasy 4 kezeńnen turady. Alǵashqy jarys 20 naýryzda AQSh pen Kanadada vırtýaldy túrde ótse, 2-kezeńniń jarystaryn Fransııa astanasy – Parıj qabyldady. Al 3-kezeń 7-8 mamyr kúnderi Aýstralııada vırtýaldy formatta ótti. Qazaqstan quramasy bul básekede eki júldege qol jetkizdi. Atap aıtqanda, qyzdar qurmasy komandalyq erkin baǵdarlamada Kanada (84,8000 ball) men Izraılden (83,9333 ball) keıin úshinshi orynǵa taban tirep, qola medal jeńip aldy. Quramanyń «Moana» anımasııalyq fılmi-
niń jelisimen daıyndaǵan «Vaıana» baǵdarlamasyna tóreshiler 79,6000 upaı berdi. Al erkin kombınasııa sanatynda Qazaqstan sportshylary amerıkalyq kompozıtor Braıan Setserdiń «Malagenıa» týyndysyna bılep, kúmis medal oljalady (79,4667 upaı).

Álem kýbogynyń (4-kezeńniń) jalpy júlde qory – 257 000 AQSh dollaryn quraıdy. Afına tórinde júzgishter taǵy 310 myń dollardy sarapqa salady.

Grekııada ótetin básekeniń orny erekshe. О́ıtkeni 17 maýsymda Majarstan astanasy – Býdapeshtte sý sporty túrlerinen XIX álem chempıonatynyń shymyldyǵy túriledi. Iаǵnı álem birinshiligine deıin iriktelgen eń úzdik atletter júzý, daıvıng, sý doby, ártistik júzý men ashyq aspan astynda sýda júzýden júldege talasady. FINA kúntizbesindegi osy sheshýshi jarysta sportshylar bar daıyndyǵyn pysyqtaı alady.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz