Eýrazııalyq ekonomıkalyq komıssııa mańyzdy máselelerdi talqylady

Keshe, 16 sáýir kúni Reseı Federasııasynyń astanasy – Máskeý qalasynda bolyp ótken Eýrazııalyq ekonomıkalyq  komıssııanyń kezekti keńesinde mańyzdy degen máseleler taǵy bir pysyqtaldy. Atalǵan jıynǵa Qazaqstan tarapynan Premer-mınıstrdiń birinshi orynbasary Baqytjan Saǵyntaev qatysty. Bul týraly QazTAG habarlady. Basqosýda Eýrazııalyq ekonomıkalyq odaq aıasyndaǵy eń mańyzdy degen máseleler jan-jaqty talqyǵa tústi. Ásirese, ıntegrasııany odan ary damytý jáne taraptardyń múddelerin eskerý turǵysynda keńinen sóz qozǵaldy. Buǵan deıin  aıtylyp júrgendeı, munaı jáne munaı ónimderi, gaz tasymaldaý, kólik tasymaly salalaryna jáne temir jol tarıfteri men aýyl sharýashylyǵyn memleket tarapynan qoldaý isine baılanysty jumyla jumys isteý áńgime arqaýyna aınaldy. Sondaı-aq, alqaly jıynda saýda isteri, sanıtarlyq-fıtosanıtarlyq sharalarǵa da kóńil bólindi. Buǵan qosa, tabıǵı monopolııa, transport, energetıka salalarynda jáne básekelestikti damytý isinde birlese áreket etý týraly da pikirler ortaǵa salyndy. Jalpy, basqosý qorytyndysy boıynsha ekonomıka, ónerkásip, aýyl sharýashylyǵy, valıýta keńistigi, qarjylyq qozǵalystar jónindegi jaǵdaıattarǵa qatysty ózara túsinistikke qol jetkizildi. Joldybaı Bazar. Derekkóz: QazTAG. Foto: Strategy.kz.