Búgin, 17 sáýir kúni Qazaqstan Parlamenti Májilis spıkeri Qabıbolla Jaqypov Reseı Federasııasynyń Sankt-Peterbýrg qalasynda ótken EýrAzEQ Parlamentaralyq Assambleıasy jıynynda osy uıymnyń tóraǵasy bolyp saılandy. Bul týraly Májilistiń baspasóz qyzmeti habarlady.
«Qazaqstan atalǵan uıymnyń damýyna, bedeliniń ósýine aıryqsha úles qosty, nátıjesinde bizdiń elimiz eki merzim qatarynan EýrAzEQ PAA-ǵa tóraǵalyq etip otyr. Plenarlyq otyrysqa ekologııa jáne ónerkásiptik qaýipsizdik, áleýmettik salalarda EýrAzEQ múshe-memleketterdiń ulttyq zańnamalaryn úndestirý, EýrAzeQ múshe-memleketter aýmaǵyna sheteldikterdiń kelý tártibin retteý syndy máseleler engizildi», - delingen habarlamada.
Ásirese, áleýmettik zańnamalardy úndestirý, naqtylaı aıtatyn bolsaq, «ataýly áleýmettik kómek týraly», «memlekettik áleýmettik saqtandyrý negizderi týraly» zańnamalyq qujattar jobasyna basa nazar aýdaryldy.
EýrAzEQ Parlamentaralyq Assambleıasynyń mańyzdylyǵyna toqtalǵan Májilis tóraǵasy Qabıbolla Jaqypov uıym qyzmetiniń EýrAzeQ múshe-memleketter zańdaryn úndestirýge, ıntegrasııanyń ekonomıkalyq aspektilerin damytýǵa, sondaı-aq, azamattardyń áleýmettik ál-aýqatyn jaqsartýǵa baǵyttalǵanyn atap ótti.
Áleýmettik zańnamalyq qujattardyń úlgilik jobasyn qaraý Eýrazııalyq ekonomıkalyq qaýymdastyq aıasynda halyqty áleýmettik qorǵaýdyń ortaq ustanymdaryn ázirleý qajettiligine negizdelgen.
Sáken Maılybaı.
Derekkóz: Parlament Májilisiniń baspasóz qyzmeti.
Foto: oralinform.kz.
