«Sandardy sóıletetin bolsaq, jol-kólik oqıǵalary saldarynan balalardyń aıtarlyqtaı zardap shegetinin kórýge bolady. Máselen, jyl saıyn 200-ge jýyq jasóspirim jol ústinde baqılyq bolyp, 3 myńnan astamy túrli dárejedegi dene jaraqatyn alyp jatady. Belgili sebeptermen ótken jyldan bastap mektep oqýshylaryna joldaǵy qaýipsizdik týraly sabaqtar ótkizilgen joq. Bul baǵyttaǵy basqa is-sharalar sany da azaıyp ketti. Sol sebepti de statıstıka ońalmaı tur», dedi J.Muratálıev.
Osy jyldaǵy esepti merzimniń ózinde jol-kólik oqıǵalary saldarynan jaraqat alǵan jasóspirimderdiń sany az emes. Kóp jaǵdaıda balalardyń ózderi ereje saqtamaıtyn kezder jıi ushyrasady.
«Osy jyldyń tórt aıynda kámelet jasyna tolmaǵan jasóspirimderdiń kinásinen 35 jol-kólik oqıǵasy tirkeldi. Saldarynan 4 jasóspirim jol apatynan qaıtys bolyp, 70 jetkinshek túrli dárejede jaraqat aldy. Esepti kezeńde respýblıka joldarynda jasóspirimderdiń qatysýymen jalpy sany 796 jol-kólik oqıǵasy tirkelgen. Jol-kólik apatynan 42 jasóspirim ómirimen qosh aıtyssa, 957-si jaraqat alǵan. Zardap shekken balalardyń jartysynan astamy jolaýshylar bolsa, qalǵany – jaıaý júrginshiler», deıdi mınıstrlik ókili.
IIM ókiliniń málimdeýinshe, balalardyń qatysýymen bolatyn jol-kólik oqıǵalary kezinde eresekter de jıi qatelikter jasaıdy. Ásirese, olar avtokólikpen tasymaldaý erejelerin jıi buzady eken. Balalarǵa arnalǵan arnaıy qural-jabdyqtardy (avto kreslo, býsterler, adapterler) qoldanbaıdy nemese jasóspirimge qaýipsizdik beldigin taqpaıdy.
«Jyl basynan beri elimizde 97 kámeletke tolmaǵan jaıaý júrginshini qaǵyp ketý deregi tirkeldi. Sonyń saldarynan 5 bala mert bolyp, 97 jasóspirim jaraqat aldy», deıdi mınıstrlik ókili. Sonymen qatar ol óz sózinde polısııa organdarynyń qyzmetkerleri bul baǵyttaǵy olqylyqtardy boldyrmaý jolynda túrli is-sharalar ótkizýdi qolǵa alǵanyn, aldaǵy ýaqytta bul baǵyttaǵy jumystar sátimen jalǵasatynyn atap ótti. Brıfıngte J.Muratálıev jaıaý júrginshilerdiń kinásinen bolatyn jol-kólik oqıǵalarynyń da azaımaı turǵanyn da atap ótti.
«Jaıaý júrginshilerdiń kinásinen bolatyn jol-kólik oqıǵalary da jetkilikti. Joldy júrý bóligi belgilenbegen jerden kesip ótý, jaqyndap qalǵan kóliktiń aldynan júgirip shyǵý, baǵdarshamǵa qaramaı óte shyǵý sekildi ereje buzýshylyqtyń saldarynan da qaıǵyly oqıǵalar oryn alyp jatady. Úlkender jaǵy osy máselege aıryqsha nazar aýdarsa eken», dedi Jandos Muratálıev óz oıyn túıindep.
