Sport • 26 Mamyr, 2022

Fransııadan oljaly oraldy

74 ret kórsetildi

Qazaqstandyq balǵyn sportshylar Fransııanyń soltústigindegi Normandııa óńirinde uıymdastyrylǵan 16-18 jas aralyǵyndaǵy mektep oqýshylary arasyndaǵy Gımnazıadaǵa tuńǵysh ret qatysyp, elimizge tabysty oraldy. Álemniń 64 memleketinen kelgen 4 myńǵa jýyq jasóspirim 17 sport túrinen jáne 3 paralımpıada baǵdarlamasynda synǵa tústi. Jerlesterimiz dúnıejúzilik Gımnazııa oıyndaryna alǵash ret qatyssa da, jarys qorytyndysynda 85 medal (32 altyn, 32 kúmis, 21 qola) jeńip aldy. Sóıtip, jalpykomanalyq esepte úzdik úshtikke endi.

Dúnıejúzilik mektep oqýshylary arasyndaǵy Gımnazıadanyń tarıhyna úńiler bolsaq, eń alǵashqy jarystyń jalaýy 1974 jyly Germanııanyń Vıs­baden qalasynda jelbiregen. 1990 jyly Brıýggede (Belgııa) uıymdas­tyrylǵan dodaǵa deıin atalǵan halyq­aralyq sporttyq joba ár eki jylda bir ret uıymdastyrylsa, keıinnen arasy 3-4 jylǵa uzardy. XXI ǵasyrda mýltı-jarysty ótkizýde Eýropa elderinen bólek, ózge de qurlyqtyń memleketteri belsendi bola bastady. Mysaly, búginge deıin Gımnazıadany Azııa qurlyǵynan – Qatar, Ońtústik Afrıkadan – Brazılııa, Afrıka qur­lyǵynan Marokko ótkizdi.

Al bıylǵy 16-18 jas aralyǵyndaǵy oqýshylarǵa arnalǵan iri halyqaralyq jarysty Fransııa osymen 5-ret ótkizdi. Gımnazıadany uıymdastyrý jaǵynan ázirshe Fransııanyń aldyna tú­setin el tabylmaı tur. Buǵan deıin Fran­sııadaǵy tórt dúnıejúzilik Gım­nazıada Orlean (1976), Lıll (1982), Nıssa (1986) jáne Kan (2002) qalala­rynda jalaýy jelbiregen bolatyn. Sóıtip, araǵa 20 jyl salyp bul qa­lalardyń tizimine Normandııa qosyldy.

Rettilik boıynsha 19-márte uıym­das­tyrylǵan bıylǵy dúnıe­júzilik jazǵy Gımnazııa oıyndary 14-22 mamyr aralyǵynda ótti. Qazaqstandyq sportshy balalar paralımpıadalyq sport túrleri men breık-danstan basqa 17 sport túrinen baq synady. Delegasııany Fransııaǵa Bilim jáne ǵylym mınıstrliginiń Ulttyq ǵylymı-praktıkalyq dene tárbıesi ortalyǵy Qazaqstannyń Mektep sport federasııasymen birge bas­tap bardy. Jarysqa qatysýshylar sany boıynsha el quramasy Fransııa men Brazılııadan keıingi úshinshi el atandy. Bizden Fransııaǵa barlyǵy 296 adam attandy. Onyń ishinde: 234 sportshy, 49 jattyqtyrýshy, 9 tóre­shi, Bilim jáne ǵylym mınıstrligi men Mektep sport federasııasynyń 4 ókili bar.

Bir aptaǵa sozylǵan dúnıejúzilik dodada jerlesterimiz sporttyń taekvondo, júzý, jeńil atletıka, dzıýdo, erkin kúres, semserlesý, kórkem gımnastıka, sporttyq gımnastıka, sadaq atý, boks, grek-rım kúresi, áıel­der kúresi jáne regbı sııaqty sport túrlerinen 85 júlde jeńip aldy. Olardyń qatarynda jazǵy Olım­pııa oıyndarynyń chempıony, jeńil atlet Olga Rypakovanyń da qyzy bar. Anastasııa Rypakova da anasy sııaqty jeńil atletıka saıysynda synǵa túsip, Fransııada kúmis medal ıelendi. Jerlesterimiz jalpy­komandalyq esepte 3-orynǵa jaıǵasty. Birinshi oryndy 114 medali bar, onyń ishinde 47 altyn jeńip alǵan Fransııa sportshylary ıelense, 45 altyn medal jeńip alǵan Brazılııa quramasy ekinshi orynǵa taban tiredi. Sonymen qatar Qazaqstan sportshylary altyn jáne kúmis medaldardyń sany boıynsha da 3-oryn alsa, qola medal boıynsha 5-orynǵa turaqtady.

Dúnıejúzilik dodadan osyndaı tabyspen oralǵan qazaqstandyq oqýshy sportshylardy Bilim jáne ǵylym mınıstri Ashat Aımaǵambetov quttyqtady. «Oqýshylarymyzdy álemdik Gımnazıadadaǵy jeńisterimen jáne joǵary jetistikterimen quttyq­taımyn. Árıne, bul júldeler – jat­tyǵýdyń, tabandy eńbektiń, tártip pen talpynystyń jemisi. Sizderge úlken úmit artyp, shyǵaryp salǵan edik, sol úmitti tolyǵymen aqtap keldińizder. Son­dyqtan ustazdaryńyzǵa, jat­tyq­­­tyrýshylaryńyz ben ata-ana­laryńyzǵa alǵys aıtamyn. Bilim jáne ǵylym mınıstrligi oqýshylar ara­­synda zııatkerlik jáne sporttyq olım­­pıadalardy damytý jumystaryn jalǵastyrady», dedi mınıstr.

Sóıtip, qazaqstandyq oqýshy sportshylar medal sany jaǵynan úzdikter qatarynan kórindi. Munyń ózi elimizdiń jas órenderi úshin úlken jetistik. Osy keshendi básekeler nátıjesine qarap-aq ár memlekettegi mektep lıgasy men jasóspirimder spor­tynyń damý qarqynyn baıqaýǵa bolatyndaı.

Sońǵy jańalyqtar

TúrkPA-nyń ataýy ózgeredi

Parlament • Keshe

Almaty joldaryn sý basty

Aımaqtar • Keshe

Uqsas jańalyqtar