Eksporttyq áleýet artýda

Aqmola oblysynda 243 sharýa jáne fermer memlekettik «Sybaǵa» baǵdarlamasyna qatysýda. Bul týraly oblys ákiminiń birinshi orynbasary Rashıt Ákimov mal sharýashylyǵyn damytý baǵdarlamasynyń oryndalý barysy týraly ótkizgen selektorlyq keńeste keńinen aıtyldy. Oblystyń aýylsharýashylyq qury­lym­darynda mal basy sanynyń artýy men onyń sapalyq kórsetkishteriniń jaqsarý úrdisi baıqalady. Byltyr qolda bar et baǵytyndaǵy sheteldik seleksııadaǵy 11,6 myń bas iri qara malǵa qosymsha taǵy da 593 asyl tuqymdy mal ákelingen. Osyǵan baılanysty asyldandyrý isin jergilikti tól esebinen molaıtý maqsatynda 19 sharýashylyq qurylyp, jumys isteýde. Bul baǵyttaǵy qyzmettiń qaıtarymyn 2013 jyly oblys sharýashylyqtaryna jáne respýblıkanyń basqa óńirlerine 1,5 myń bas asyl tuqymdy tól satyl­ǵanynan kórýge bolady. Keshendi josparǵa sáıkes, oblys­ta 13,5 myń basqa deıin mal ustaýǵa laıyqtalǵan 5 bordaqylaý alańy quryl­dy (Eńbekshilder aýdanynyń «KazBeef LTD»JShS, Qorǵaljyn aýdanynyń «Agro Ekspert LTD» JShS, Jaqsy aýdanynyń «Novokıenka» JShS, Atbasar aýdanynyń «Bastaý» JShS, Astrahan aýdanynyń «Kolýton-04» JShS). Sondaı-aq, bul iske sharýa jáne fermerlik qojalyqtardy keńinen tartý aýyl ómirin jaqsartýǵa yqpal etkenin atap ótý qajet. Oblys basshylyǵy bul rette, iri qara sanyn 17,2 myń basqa kóbeıtýdi kózdep, bul iske keminde 230 sharýa qojalyǵyn tartýdy josparlaǵan. Jergilikti bılik pen «Sybaǵa» baǵdarlamasynyń qoldaýy nátıjesinde, bıyl oblystaǵy 243 sharýa qojalyǵy 15300 sıyrǵa kútim jasaýda. Baqbergen AMALBEK, «Egemen Qazaqstan». Aqmola oblysy.