Bekzattyń áýesqoılar rınginde eleýli tabystarǵa qol jetkizgeni barshaǵa málim. Marat Jaqıevtaı bilikti mamannan tálim-tárbıe alǵan 24 jastaǵy Mańǵystaý oblysyndaǵy Jańaózen qalasynyń týmasy 2006 jyly jastar arasyndaǵy álem birinshiliginde qola medaldy ıelegennen keıin kópshilik nazaryna ilikti. 2009 jyly Reseıdiń Ekaterınbýrg qalasynda jalaýy jelbiregen álem chempıonatynda qandasymyz jasyndaı jarqyldap, bas júldeni qanjyǵasyna baılady. Ásirese ol Hýlıo de la Krýsty utqanda shattanbaǵan qazaq qalmady-aý! Tipti Nurdáýletov Rıo Olımpıadasynyń jeńimpazy, álemniń tórt dúrkin chempıony, Panamerıka oıyndarynyń úsh dúrkin jeńimpazy degen ataǵy bar dańqty kýbalyq boksshyny eseńgiretip te tastady.
Bekzat 2021 jyly Tokıo Olımpıadasyna qatysty. О́kinishke qaraı, japon jerinde onyń joly bolmady. 2020 jyldyń kúzinde ol Atyraýda kásipqoılar arasyndaǵy tusaýkeser kezdesýin ótkizip, tanzanııalyq Ibragım Madjogyndy ekinshi raýndta uryp jyqty. Odan keıin nıgerııalyq Kabırý Tovalavı men ózbekstandyq Farýh Jýraevty upaı sanymen utty. Bıyl 5 aqpanda Aqtaýda ótken týrnırde nıderlandtyq Chıso Kvasıdi toǵyzynshy raýndta esinen tandyrǵan Nurdáýletov WBO Youth nusqasy boıynsha álem chempıony atandy.
Bekzattyń kelesi qarsylasy da osal emes. «Bombalaýshy» degen laqap atpen tanylǵan argentınalyq Dýrval Palasıo osy kúnge deıin 11 kezdesý ótkizip, sonyń toǵyzyn óz paıdasyna sheshken. Alty básekede aıqyn basymdyq tanytty.
Aqtaýdaǵy boks keshindegi Bekman Soılybaev pen Meıirim Nursultanovtyń da jekpe-jekteri kópshiliktiń qyzyǵýshylyǵyn týdyrady degen oıdamyz. 31 jastaǵy Bekman (13-1, 5 KO) ózinen on jas úlken meksıkalyq Tomas Rohaspen aıqasady. Astekter eli ókiliniń júrip ótken jolyna tańdanbaý múmkin emes. Kásipqoı rıngtegi óziniń tusaýkeser kezdesýin Rohas osydan shırek ǵasyrdan asa ýaqyt buryn ótkizgen eken. Sol kezden beri rıngke 74 ret kóterildi. 52 márte jeńiske jetip, 34 qarsylasyn nokaýtqa jiberdi. 19 ret jeńilip, bir básekeni teń aıaqtady. Bir aıta keterligi, dál sol jarys ótetin kúni Tomas 42 jasqa tolady. Al eshkimnen jeńilip kórmegen 28 jastaǵy Meıirim Nursultanov (16-0, 9 KO) argentınalyq Sebastıan Orasıo Papeskımen aıqasady. Onyń kórsetkishi – 21 jekpe-jek, 18 jeńis (6 nokaýt) jáne 3 jeńilis.
