Jerlesimiz toptyq kezeńniń jeti oıynynda muzaıdynǵa shyǵyp, qarsylas komanda oıynshylarynyń bizdiń qaqpaǵa baǵyttaǵan 179 shaıbasyn qaıtarǵan. Sondaı-aq qarsylas quramalardyń hokkeıshileri Shýtov qorǵaǵan qaqpaǵa 206 soqqy jasaǵan. Bul – toptyq kezeńde bir ǵana qaqpaǵa baǵyttalǵan eń kóp soqqy. Paıyzdyq kórsetkish boıynsha, jerlesimiz jalpy esepte 86,89 paıyzben úshinshi orynǵa taban tiredi. Budan bólek Shýtov qaqpashylar arasynda muzaıdynda eń kóp ýaqyt ótkizgen oıynshy retinde de rekord ornatty. Andreı óz qaqpasyn 381 mınýt 12 sekýnd qorǵady. Osy ýaqyt aralyǵynda ol qaqpasyna 27 shaıba ótkizip aldy.
Aıta keteıik, elıtaly dıvızıonnyń álem chempıonatynda «A» tobynda óner kórsetken Qazaqstan quramasy sońǵy týrda Italııadan basym túsip, joǵary toptaǵy ornyn saqtap qaldy. Kelesi jylǵy álem birinshiligi Fınlıandııa men Latvııada ótetin bolyp bekitildi.
