Zamanaýı tehnologııa – memlekettik qyzmette

Keshe Astanada «Memlekettik qyzmet sektorynda adamı resýrstardy basqarýdyń avtomattandyrylǵan júıeleri» taqyrybynda Qazaqstan Respýblıkasy Memlekettik qyzmet isteri agenttigi men Eýroodaqtyń «Qazaqstan úkimeti memlekettik qyzmet reformasy jáne modernızasııasy» jobasynyń qoldaýymen semınar ótti. Memlekettik qyzmet isteri agent­­tiginiń tóraǵasy Álıhan Baı­­menov semınardy asharda sóı­legen sózinde: «Eńbek tıimdi­ligin arttyryp, kez kelgen ju­mys­ty jeńildetip, ońtaıly paıda­laný – qashannan bergi adamzat ba­lasynyń ári qaraıǵy damýyn­daǵy zańdylyqtarynyń biri. Sońǵy jyldary aqparattyq tehnologııa­lar ómirdiń barlyq salasynda keńinen paıdalanylýda. Olardyń baǵyty – adamı resýrstardy basqarýdyń sapasyn arttyrý. Sol sebepten de, elimizde osy turǵyda biraz qadamdar jasaldy. Qazaqstan zamanaýı tehnologııalardy qoldanýdyń nátıjesinde memlekettik apparattyń tıim­diligine qol jetkizip, memleket kórsetetin qyzmettiń sapasyn arttyrýda biraz jumys atqardy. Bizdiń memleketimiz BUU-nyń Elektrondy úkimetti damytýdyń jahandyq bedelbaǵasy (reıtıngi) boıynsha 2012 jyly – 38-shi, al elektrondy qatysý ındeksi boıynsha 2-shi oryndy ıelendi», dedi. Osylaı degen tóraǵa elimizdiń memlekettik qyzmette zamanaýı tehnologııalardy paıdalanýda álemdegi ozyq tájirıbelerdi zerdeleýde ekendigin, bul rette Nıderland úkimetiniń eń aldyńǵy orynda ekenin qaperge saldy. Sol sebepten de, bizdiń mamandarymyz Nıderlandqa baryp, P-Direkt memlekettik kompanııasynyń jumysyn zerttedi. Mine, búgin barlyq mınıstrlikterdiń personaldy basqarý qyzmetteriniń ókilderi qatysyp otyrsyzdar, semınarda memlekettik organdarda osy «e-qyzmet» júıesi qalaı damýy kerek, ol ne beredi, qandaı artyqshylyqtary bar degen baǵytta áńgime órbitetin bolamyz, dedi. EO Jobasynyń sheshýshi sarapshysy J.Maksımılıan Fıodınger óz kezeginde memlekettik qyzmette adam resýrstaryn basqarý júıesin avtomattandyrýdaǵy halyqaralyq tájirıbelerge toqtalyp: «Meniń bul baǵytta aıtqan áńgimelerimnen góri, sizder úshin osy tájirıbeni naqty túrde tıimdi júzege asyryp júrgen jannyń ortaǵa shyqqany durysyraq bolar», dep minberge kelesi kóteriletin sheshendi tanystyryp ótken. Ol – Nıderland memlekettik sektorynda kadrlyq úderisterdi avtomattandyrý boıynsha mol tájirıbesi bar nıderlandtyq P-Direkt memlekettik kompanııasynyń prezıdenti Sılvııa Bromans eken. Nıderland memleketindegi 10 mınıstrliktiń kadrlyq úderisterin ortalyqtandyrýmen jáne standarttaýmen aınalysatyn kompanııa ózderi atqarǵan jumystarynda mol tájirıbe jınaqtapty. D-r Sılvııa Bromanstyń ortaǵa salǵan oılarynan málim bolǵanyndaı, Nıderland úkimeti 2003 jyly resýrstardy únemdeý ári tıimdiligin arttyrý maqsatynda HR qyzmetin qaıta qurýdy josparlapty. Sóıtip, 2004 jyly jumysyn bastaǵan kompanııanyń alǵashqy tájirıbesi dál kútkendeı bolyp shyqpapty. «Biraq biz qandaı qatelikter jibergenimizdi, keleshekte neni esepke alýymyzdy túsindik. Munan soń 2007 jyly jobany 2 kezeńde atqarý kerek degen uıǵarymmen jumysymyzdy ári qaraı jalǵastyrdyq. Qolǵa alǵan isimiz nátıjeli boldy. Qazirgi kúni 10 mınıstrliktiń jumysy ortalyqtandyrylǵan 1 portal arqyly júzege asyp, tipti, eńbekaqy tóleýdiń ózi bir júıemen atqarylýda. Móldir de ashyq júrgiziletin osy jumys eńbek tıimdiligin arttyryp, endi memlekettik qyzmetshiler qaǵazbastylyqtan arylyp, ákimshilik jumystarynan góri strategııalyq maqsattarǵa moıyn burýǵa kóp ýaqyttaryn jumsaıtyn boldy. Qazir biz bul júıeniń uıaly telefondar, smartfondar men planshetter arqyly júrgiziletin mobıldi nusqasyn da endirdik. Qysqasy, biz ózimizge tapsyrys berýshi memlekettik organdardyń adymyn keńeıttik. Ár toqsan saıyn júıemizdi jetildirip otyrý da bizdiń basty maqsattarymyzdyń biri», dedi Sılvııa Bromans. Memlekettik qyzmette adam resýrstaryn únemdep, olardy mazmundy jumysqa baǵyttaýǵa múmkindik beretin «e-qyzmet» jobasyn engizýdiń daıyndyq jumystary elimizde osydan 3 jyl buryn qolǵa alynǵan bolatyn. Qazirgi kezeńde negizgi daıyndyqtyń sońǵy kezeńi ótýde, al 2015 jyldan bastap, qanatqaqty rejimde osy qyzmet ene bastaıdy. Semınarda elimizdegi memlekettik qyzmettegi personaldy basqarýdy avtomattandyrý úrdisteriniń negizgi máselelerin Qazaqstan IT-kompanııalar qaýymdastyǵynyń prezıdenti Nurlan Isın, Personaldy basqarýdyń «e-qyzmet» yqpaldastyrylǵan aqparattyq júıesin qurý jobasy boıynsha Ońǵarbaı Dánebekov, Qazaqstandaǵy HR menedjment jaıynda «Samuryq-Qazyna» UÁQ» AQ Adam resýrstaryn basqarý departamentiniń dırektory Gúlmıra Raısova baıandamalar jasap, semınarǵa qatysýshylar elimizdegi kadrlyq saıasat pen adamı resýrstar júıesin avtomattandyrýdy ulttyq kompanııalardyń mysalynda taldady. Anar TО́LEÝHANQYZY, «Egemen Qazaqstan».