Qazaqstan –Túrkııa baǵyty boıynsha taǵy 16 reıs ashylady

ASTANA. 21 sáýir.Kólik jáne kommýnıkasııa mınıstrligi aldaǵy ýaqytta «Antalııa-Almaty», «Antalııa-Astana» jáne «Antalııa-Qaraǵandy» baǵyttary boıynsha eki jaqtan da ushatyn 16 reıs ashylatynyn málimdedi. Bul týraly Kólik jáne kommýnıkasııa mınıstrliginiń baspasóz qyzmetine silteme jasaǵan Today.kz  habarlady. Atalǵan reıster týraly  Qazaqstan men Túrkııa taraptarynyń avıasııa uıymdary kelisken. Jalpy, alǵashqyda Túrkııa jaǵynan túsken bul usynysty mınıstrliktiń azamattyq avıasııa komıteti muqııat zerttegen. Naqtylaı aıtqanda, atalǵan komıtet Qazaqstan-Túrkııa baǵytyndaǵy týrıstik tasymaldaý naryǵynyń monıtorıngi nátıjesi boıynsha osyndaı sheshim qabyldady. Bul monıtorıngti  júrgizý barysynda qazaqstandyq týroperatorlar, Kásipkerlerdiń ulttyq palatasy, Qazaqstan týrıstik qaýymdastyǵy jáne Indýstrııa jáne jańa tehnologııalar mınıstrliginiń týrızm ındýstrııasy komıteti qatystyryldy. Azamattyq avıasııa komıtetiniń tóraǵasy Beken Seıdahmetov: «Biz túrkııalyq áriptesterimizben eki el arasyndaǵy ushýlar múmkindigin áldeneshe ret talqylaǵan bolatynbyz. Bizdiń azamattarymyzdyń arasynda atalǵan baǵyttardyń joǵary suranysqa ıe ekendigin eskere otyryp, 2014 jyldyń jazǵy kezeńine tolyqtaı aptasyna qosymsha 16 reıs ashý týraly sheshim qabyldandy. Basty shart –reısterdiń turaqty bolýy. Bul atalǵan reıster bekitilgen keste boıynsha júzege asady», – dep atap ótti. Joldybaı Bazar. Derekkóz: Today.kz. Foto: Inform.kz.