«Bıyl sáýir men mamyrda tabylǵan óli ıtbalyqtardyń arasynda eshqandaı aıyrmashylyq joq. Barlyǵynyń da óleksesi ydyrap ketken. Mańǵystaý oblysy ekologııa departamentiniń qyzmetkerleri jergilikti aýa men sýdan synama aldy. Zertteý nátıjesi boıynsha konsentrasııanyń artyq mólsheri anyqtalǵan joq. Itbalyqtardyń qyrylýyna sebep bolatyndaı zııandy zattar da tabylmady. Sonymen qatar gıdrobıologııa jáne ekologııa ınstıtýty ólgen ıtbalyqtardyń uzyndyǵy men salmaǵyn ólsheý, jynysy men jasyn anyqtaý úshin olardyń qabyrshaqtary men tyrnaǵy arqyly zertteý júrgizdi», delingen vedomstvo habarlamasynda.
Ekologııa mınıstrliginiń resmı aqparatyna sáıkes ıtbalyqtar qyrylýynyń boljamdy sebebin maýsymda jarııalaý josparlanyp otyr.
Qazirgi ýaqytta zertteý jumystary jalǵasyp jatyr.
Sondaı-aq, vedomstvo jyl basynan beri Kaspıı jaǵalaýynan 219 ıtbalyqtyń óleksesi tabylǵanyn rastady.
«Buǵan deıin tabylǵan ıtbalyqtardyń qańqalary qatty ydyrap ketkeni habarlandy. Sol sebepti toksıkologııalyq, gıstologııalyq jáne vırýsologııalyq zertteý júrgizý úshin synama alý múmkin bolmady. Osy oraıda mınıstrlik ıtbalyqtar qysta ólgen degen boljam jasap otyr. Tabylǵan ıtbalyqtardyń óleksesi Jaıyq-Kaspıı oblys aralyq basseındik balyq sharýashylyǵy ınspeksııasy jáne jergilikti atqarýshy organdardyń kúshimen sanıtarlyq talaptardy saqtaı otyryp joıylady», delingen habarlamada.
