Naýqan erte bastalady

Erte kelgen kóktem shyǵys­qa­zaqstandyq dıqandardy der kezinde egis dalasynan tabylýǵa mindettedi. Qar ábdekeı túse erip ketkendikten, naýryzdyń ekin­shi jartysy men sáýirdiń basynda kún kúrt jylynyp, temperatýra 20-25 gradýs shamasyna deıin kóterildi. Aýa raıynyń jyldaǵydan erte jylynýy óńirdegi sharýashylyqtarǵa topyraqtaǵy ylǵaldy saqtaý jáne egistik jumystaryna shuǵyl ázirlenýdi talap etti. Atalǵan jaıt egis alqaptary mol Zyrıan, Glýbokoe aýdandaryna qolaıly jaǵdaı jasasa, Kókpekti, Boro­dýlıha jáne Shemonaıha aýdandaryna birqatar qosymsha mindetter artty. Jýyrda Borodýlıha aýda­­­nynyń ortalyǵynda ótken «Agroónerkásiptik keshen já­ne bıznestiń áleýmettik jaýap­ker­shiligin damytý» atty kóshpeli semınar-keńeste oblystyń azyq-túlik beldeýin qamtamasyz etý jó­nindegi Prezıdent tap­syr­malarynyń oryndalý barysy talqylandy. Atalǵan jıynǵa óńir bas­shysy Berdibek Saparbaev jáne oblystaǵy birneshe aýdandardyń ákimderi, aýyl sharýashylyǵy basqarmalarynyń mamandary men agrosektorda eńbek etip júrgen sharýa qojalyqtarynyń jetekshileri qatysty. Búgingi tańda agroónerkásiptik keshender memlekettiń tıimdi qoldaýynyń arqasynda damýǵa bet aldy. Aıtalyq, atalǵan salada jyl saıyn memlekettik baǵdarlamalar sheńberindegi sýbsıdııalaý kólemi 10-15 mlrd. teńgeni quraıdy. Kóktemgi egis jumystarynyń barysy jaıynda aýyl sharýashylyǵy basqarmasynyń basshysy Dúı­sembaı Selıhanov áńgimeledi. Basqarma basshysynyń aıtýynsha, aǵymdaǵy jyly egis alqaptaryn 50 myń gektarǵa arttyrý kózdelip otyr. Oblys boıynsha tekserýge tapsyrylǵan tuqym kólemi 88 paıyzdy quraıdy. Bul ótken jylmen salystyrǵanda 22 pýnkt joǵary eken. Birinshi jáne ekinshi surypty astyq tuqymynyń da kólemi kóbeıgen. Barlyq aýdandarǵa qajetti janar-jaǵarmaı máselesi de sheshimin tapty. Pavlodar qalasynan 25 myń tonna jaǵarmaı jetkizýge kelisimshart jasaldy. Sońǵy jyldary tuqym sapasyn arttyrý baǵytynda da oń jumystar jasalyp jatyr. Máselen, aýdandaǵy Jańa Shúlbi aýylynda ornalasqan «Lazarev ı K» JShS – oblystaǵy elıtaly tuqym óndiretin sanaýly sharýashylyqtardyń biri. Byltyr mol jınalǵan ónimdi saqtaý úshin onda tuqym saqtaıtyn eki úlken qamba turǵyzylǵan. Sharýashylyqtyń bas agronomy Sergeı Levchenkonyń aıtýynsha, syıymdylyǵy 5 myń tonnaǵa deıin jetetin qambada joǵary surypty kúnbaǵys, bıdaı tuqymdary saqtalýda. Aýdandaǵy iri aýylsharýashylyq qurylymdarynyń biri sanalatyn «Novaıa Zarıa» sharýa qojalyǵynyń ıeliginde 25 myń gektar egis alqaby bar. Qazir sharýashylyq tehnıkalary naýqandyq jumysqa tolyǵymen ázir. Munda da mal basy kóbeıip kele jatqandyqtan, egis alqabynyń negizgi bóligin malazyqtyq daqyldar quramaq. Bıyl agroónerkásiptik keshenniń jańa baǵyttaryn damytý, bos jatqan jer telimderin ıgerý jumystaryn belsendi júrgizý jos­parlanyp otyr. Bıznestiń áleý­mettik jaýapkershiligi baǵdarla­masy aıasynda jumystar jandanyp keledi. – Sońǵy úsh jylda agrarlyq salada 220 keleshegi bar joba júze­ge asty. Jobalar Prırechnoe, Prı­volnoe, Bobrovka aýylda­rynda jáne basqa eldi mekender­de sátimen iske asyrylyp keledi. Bul aýyldardaǵy sharýa qoja­lyqtarynyń jetekshileri bız­nestiń áleýmettik jaýapkershiligin jete túsinip, belsendi jumys isteýde, – dedi D. Selıhanov. Oblysta qolǵa alynatyn jańa joba negizinde 2018 jylǵa deıin ár aýdanda úlgili aýyldar qurý josparlanyp otyr. Bul sanatqa búginge deıin 16 eldi meken tań­da­lyp alyndy. Onyń ishinde burynǵy 9 tirek aýyly bar. Atalǵan aýyldar­dy damytýdyń keshendi jos­pary ázirlengen. Borodýlıha aýdanynyń ákimi G.Akýlovtyń aıtýynsha, usaq sharýashylyqtardy irilendirý jáne seriktestikter qurý jalǵasýda. Aǵymdaǵy jyly sýarmaly alqap aýmaǵyn ylǵal saqtaý tehnologııasy boıynsha 90 myń gektarǵa jetkizý josparlanyp otyr. Agroónerkásiptik salany da­my­týǵa memlekettik qoldaýmen birge ǵylym salasy da atsalysýda. Máselen, Semeıdegi Aýyl sharýa­shylyǵy ǵylymı-zertteý ınstıtýtynda topyraqtyń ónimdilik deńgeıin kórsetetin elektrondy kar­ta ázirlendi. Sonymen birge, arnaýly mamandar túrli daqyldardy sebý, olardy maýsym boıy kútý, bap­taý keńesterimen qamtamasyz etedi. Dýman ANASh, «Egemen Qazaqstan». Shyǵys Qazaqstan oblysy, Borodýlıha aýdany.