«Keshe elimizde aıryqsha máni bar tarıhı oqıǵa boldy. Memleketimiz damýdyń jańa kezeńine qadam basty. Ata zańymyzǵa usynylǵan ózgeristerdi azamattardyń basym kópshiligi qoldady. Referendým joǵary deńgeıde ótti. Muny halyqaralyq jáne otandyq baıqaýshylar da aıtyp jatyr.
Konstıtýsııalyq reformalar qoǵamda qyzý talqylandy. Daýys berý barysy demokratııa talaptaryna saı ótti. Eshqandaı májbúrlik bolǵan joq.
Referendým nátıjesi saıası jańǵyrýdyń anyq sımvolyna aınaldy. Azamattarymyz zor jaýapkershilik tanytty jáne otansúıgishtik qasıetin pash etti. Biz Jańa, Ádiletti Qazaqstandy qurý jolyndaǵy birligimiz bekem ekenin kórsettik.
Konstıtýsııalyq túzetýler memlekettigimizdiń tuǵyrnamasyn túbegeıli ózgertedi. Búkil qoǵamnyń damýyna tyń serpin beredi.
Referendýmǵa belsene qatysyp, qoldaý bildirgen barsha halqymyzǵa zor rızashylyǵymdy bildiremin. Sondaı-aq, konstıtýsııalyq ózgeristerdiń mán-mańyzyn túsindirýge atsalysqan azamattarǵa, túrli qoǵamdyq uıymdarǵa alǵys aıtamyn», dedi Qasym-Jomart Toqaev.
