Keshegi referendým eń aldymen, Ata Zańymyzǵa ózgerister engizýdi kózdedi. Elimiz jańa dáýirdiń betburysty kezeńine qadam basty, aıtýly kúni birtutas Qazaqstan halqy óz bolashaǵy úshin daýys berdi. Osy kúni Qazaqstan halqynyń tolaǵaı tutastyǵy, Prezıdentke degen senimi, myzǵymas birligi taǵy da aıqyn kórindi.
Alda bolatyn konstıtýsııalyq reformalar – memleketimiz úshin, ondaǵy árbir azamattyń bolashaǵy úshin asa mańyzdy. Kez kelgen damyǵan elde adam quqyǵy birinshi orynda turatyny ras. «Ár qazaq – meniń jalǵyzym» degen qanatty sózdiń maǵynasy tereńde jatsa kerek. Qoǵamnyń irgesin berik qalaıtyn árbir qazaqstandyq óz quqyǵynyń naqty qorǵalatynyna senimdi bolmaıynsha, jarqyn bolashaqqa qaryshtap qadam basa almasymyz anyq. Budan bylaı, Adam quqyqtary jónindegi ýákildiń mártebesi artady, mundaı dárejedegi ýákil azamattardyń quqyqtary tolyq qorǵalatynyna kepildik beredi.
Endigi jerde ákimderdiń derbestigin arttyrý da kózdelip otyr, halyq ákimderdi de ózderi saılaıtyn boldy. Bul endi turaqty úrdiske aınalady. Qazirdiń ózinde oblys, aýdan, qala ákimderin saılaýǵa daıyndyq júrgizilip jatyr. «Elimizde joǵary saıası jaýapkershilik mádenıeti ornyǵýy qajet. Búkilhalyqtyq referendým jańa ádiletti Qazaqstandy qurýdyń mańyzdy bastamasy bolmaq» degen Memleket basshysynyń sózinen Qazaqstandy alǵa damytýda túbegeıli paıymy bar, asa tájirıbeli kóshbasshynyń tabandy kózqarasy taıǵa tańba basqandaı kórinedi. Prezıdent Qasym-Jomart Toqaev strategııalyq oıshyl retinde úlken reformanyń bastamasyn usynyp, ony halqymyz bir aýyzdan qoldady. Bıylǵy jyldyń 12 maýsymynda Qasym-Jomart Kemelulynyń memleket basshylyǵyna kelgenine úsh jyl tolady. Referendým sol aıtýly kúnniń qarsańyna tuspa-tus kelip otyr. Osy ýaqyt ishinde ol kisiniń el egemendigin qurmet tutatyny, joǵary baǵalaıtyny jáne el múddesin janyn salyp qorǵaıtyny kórindi. Qańtar oqıǵasy kezinde el táýelsizdigine qanshalyqty qaýip tóngenine bárimiz kýá boldyq, sol kezde memleket múddesi úshin naqty sheshim qabyldaı bilgen el basshysynyń tabandylyǵy men qaısarlyǵyn qazaqstandyqtar umytqan joq.
Saıasatta shalt qımylǵa jol berilmeıdi, ásirese qazirgideı kúrdeli geosaıası jaǵdaılarda ár qadamymyzdy aqylmen, baıyppen qaraýymyz kerek. Basqasha bolǵanda, onyń arty orasan zor qaterge, zardapqa ákelip soǵýy múmkin.
Keshegi referendým saıası transformasııasynyń bastamasy ǵana. Budan bylaı sýperprezıdenttik basqarý úlgisi kelmeske ketip, yqpaldy Parlamenti men esep beretin Úkimeti bar prezıdenttik respýblıka ornamaq.
El basshysy qoǵamda oryn alǵan eskirgen stereotıpter men jalǵan ǵylymı ıdeıalarǵa baılanysty qubylystarǵa syn aıtyp, damýdyń shynaıy zańdylyqtaryn ǵylymı turǵydan túsinetin qoǵamda teris kózqarastarǵa oryn joq ekenin aıtqan bolatyn. «Elimizde bilim men damý ústemdik etýi kerek. Jańa ıdeıalardy týdyratyn erkindik pen shyǵarmashylyq atmosferasy – qazirgi álemdegi negizgi tabysty faktordyń biri bolýy tıis», degen Memleket basshysynyń sózin ár Qazaqstan azamaty qoldaıtynyna senemin.
Sát TOQPAQBAEV,
zapastaǵy general-polkovnık
