Oblystyq kásipkerlik jáne týrızm basqarmasynyń basshysy Nurbol Jańabekovtiń aıtýynsha, sáýir aıynan beri 536 tonna qant jetkizilipti. Onyń 408 tonnasy «Ideal Market» JShS-niń saýda jelilerine, al 128 tonnasy ózge sýpermarketterge berilgen. Endi Almaty oblysyndaǵy «Kóksý qant» zaýytynan 408 tonna qant jetkizýge kelisim jasalǵan.
– Sýpermarket jelilerinde qant ár adamǵa úsh kılodan satylady. О́ıtkeni jeke dúken ıeleri nemese basqa da tutynýshylar qantty bir mezette tómen baǵamen kóp mólsherde satyp alýy múmkin. Sóıtip, qant baǵasyna ústeme qosyp, qymbatqa satady. Sondyqtan, sýpermarketterde qant belgili bir merzimde ǵana sórege shyǵarylady, – deıdi N.Jańabekov.
Saýda oryndaryndaǵy azyq-túlik baǵasyna reıd júrgizilip jatyr. Mundaı monıtorıngti aptasyna birneshe ret júrgizý kózdelgen. «Bul azyq-túlik baǵasynyń turaqtylyǵyn, negizsiz ósýine baqylaý úshin qolǵa alyndy. Maqsat – turǵyndarǵa azyq-túliktiń qoljetimdi baǵamen usynylýyn qadaǵalaý», deıdi basqarma basshysy.
«Ideal market» JShS qoıma logıstıkasy beketiniń dırektory Qýanysh Álimbetovtiń málimetinshe, osy aptada Almaty oblysyndaǵy «Kóksý qant» zaýytynan 2 vagonmen 66 tonna qant jetkizilgen. Bul taýar «Ideal» jáne «Lıder» sýpermarketteriniń 35 saýda núktesine satylymǵa shyǵarylady.
– Qazir Atyraýda bólshek saýdadaǵy qanttyń baǵasy – 385 teńge. Endi satylymǵa shyǵarylatyn qanttyń
1 kılosy 500-517 teńgeden bastalady. Buǵan tasymaldaý qunynyń qymbattaýy sebep bolyp tur. Jaqyn kúnderi otandyq zaýyttan taǵy eki vagonmen qant jetkizý kózdelip otyr, – dep málim etti Qýanysh Álimbetov.
Atyraý oblysy
