Otyrysty ashqan Májilis Tóraǵasy Erlan Qoshanov depýtattardy Qazaqstannyń jańartylǵan Konstıtýsııasymen quttyqtady.
– 5 maýsymda ótken referendýmnyń qorytyndysy qazaqstandyqtardyń basym kópshiligi Prezıdenttiń saıası jańǵyrý baǵytyndaǵy baǵdarlamasyn qoldaıtynyn kórsetti. Birlik pen senim – Jańa Qazaqstannyń negizgi tiregi. Halqymyzda erteńge degen senim, aýyzbirlik, tatýlyq pen turaqtylyq bar. Endigi kezekte Prezıdentimizdiń mańaıyna toptasyp, osy senim men yntymaqty eseleı túsýge tıispiz. Memleket basshysynyń senimin aqtap, saıası ózgeristerdi zańnamalyq turǵyda sapaly ári jedel iske asyrýymyz qajet, – dedi Palata Spıkeri.
Jalpy otyrysta Palatanyń Ekonomıkalyq reforma jáne óńirlik damý komıteti Memleket basshysynyń jekelegen tapsyrmalaryn iske asyrý máseleleri boıynsha ózgerister men tolyqtyrýlar engizý týraly zań jobasyn jumysqa aldy. Sonymen qatar jıynda depýtattardyń bastamasymen ázirlengen qylmystyq jolmen alynǵan kiristerdi zańdastyrý jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý jáne Ákimshilik quqyq buzýshylyq týraly kodekske joǵaryda atalǵan túzetýlerdi engizý týraly zań jobalary maquldandy.
Bul qujattar zańnamany jáne qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyldyń ulttyq júıesin jetildirý maqsatymen ázirlengen.
– Bıyl Qazaqstan qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy kúres jónindegi Eýrazııalyq toptyń ózara baǵalaýynyń ekinshi kezeńinen ótýi kerek. 2021 jyldyń kúzinde aqshany jylystatýǵa qarsy kúrestiń qarjylyq sharalaryn ázirleý toby halyqaralyq standarttarǵa sáıkes negizgi usynystardy ulttyq zańnamaǵa engizý maqsatynda zań jobasyn ázirleýge bastamashylyq jasady, – dedi Májilis depýtaty S.Sımonov.
Jalpy otyrysta qarjy naryǵy men qarjy uıymdaryn memlekettik retteýdi, baqylaý men qadaǵalaýdy kúsheıtý jáne qarjylyq pıramıdalardyń qyzmetine qarsy is-qımyl máseleleri boıynsha ózgerister men tolyqtyrýlar engizý týraly jáne Ákimshilik quqyq buzýshylyq týraly kodekske osy atalǵan túzetýlerdi engizý týraly depýtattardyń bastamasymen ázirlengen zań jobalaryn birinshi oqylymda maquldandy.
Osy zań jobasy boıynsha baıandama jasaǵan Májilistiń Qarjy jáne bıýdjet komıtetiniń múshesi Iýrıı Lı zańnyń 217-babynda endi tanymal tulǵalar, sonyń ishinde ánshiler men blogerler, vaınerler qarjylyq ónimge qatysty jarnama jarııalar aldynda óte muqııat bolýy kerektigi anyq jazylǵanyn atap ótti.
– Budan bylaı qarjylyq ónimge baılanysty jarnama jasaǵandarǵa zań aıasynda qylmystyq jaýapkershilik kózdeledi. Onyń ishinde 2000 AEK jáne 600 saǵattyq qoǵamdyq jumysqa tartylý, tipti 2 jylǵa deıin bas bostandyǵynan aıyrý qarastyrylǵan. Birlesken toptar úshin qylmystyq jaza 3-7 jyl aralyǵynda bolýy múmkin. Sonymen qatar bap sanksııasyna qaraı múlikti tárkileý de kózdelgen. Bul – óte qatań shara, – dedi Iý.Lı.
О́z kezegine Májilis Tóraǵasy bul mańyzdy zań jobasyna Májilis depýtattary bastamashy bolǵanyna keńinen toqtalyp, zań jobalarynyń qarjy pıramıdalaryn qurǵany jáne ony jarnamalaǵany úshin jaýapkershilikti kúsheıtýge baǵyttalǵanyn aıtty.
Sondaı-aq jalpy otyrys barysynda depýtattar birqatar zań jobasyn ekinshi oqylymda maquldap, Senattyń qaraýyna jiberdi. Joǵary palataǵa jiberilgen qujattardyń qatarynda – salyq jáne bıýdjetke tólenetin basqa da mindetti tólemder týraly Salyq kodeksi, quqyq qorǵaý qyzmetin ótkerý tártibin jetildirý máseleleri boıynsha ózgerister men tolyqtyrýlar engizý týraly zań jobasy jáne volonterlik qyzmet, qaıyrymdylyq, memlekettik áleýmettik tapsyrys jáne úkimettik emes uıymdarǵa arnalǵan granttar máseleleri boıynsha ózgerister men tolyqtyrýlar engizý týraly zań jobalary bar.
Jalpy otyrysta depýtattar Úkimettiń jáne Respýblıkalyq bıýdjettiń atqarylýyn baqylaý jónindegi esep komıtetiniń 2021 jylǵy respýblıkalyq bıýdjettiń atqarylýy týraly esepterin qarady.
Onda Premer-Mınıstrdiń orynbasary – Qarjy mınıstri Erulan Jamaýbaev, Esep komıtetiniń tóraǵasy Natalıa Godýnova baıandama jasady.
Qarjy mınıstri Erulan Jamaýbaevtyń málimdeýinshe, transfertterdi esepke almaǵanda kirister boıynsha jospar 156 mlrd teńgege asyra oryndalǵan.
– Bıýdjetke 7,4 trln teńge tústi. Salyq túsimderi 7,1 trln teńgeni nemese josparǵa qaraǵanda 102,1 paıyzdy qurady. Salyq boıynsha asyra oryndaýdyń negizgi somasy korporatıvtik tabys salyǵyna (225 mlrd teńge), shıki munaıǵa eksporttyq keden bajyna (89 mlrd teńge) jáne ımportqa qosylǵan qun salyǵyna (41 mlrd teńge) tıesili boldy, – dedi E. Jamaýbaev.
Premer-Mınıstrdiń orynbasary – Qarjy mınıstriniń aıtýynsha, ekonomıkadaǵy iskerlik belsendiliktiń birtindep jandanýy, salyq ári kedendik ákimshilendirýdi jetildirý men sıfrlandyrý boıynsha júrgizilip jatqan jumys salyq túsimderin ulǵaıtýdyń mańyzdy faktorlarynyń biri bolyp sanalady.
Otyrys barysynda depýtattar mınıstrlerge birqatar suraq qoıyp, pikir almasty.
