Jaıylym tapshylyǵy ózekti bolyp tur

Kezdesý kezinde Qaroı jáne Jaras­paı aýyldyq okrýg­teri­­niń turǵyndary jaıylym tap­shylyǵyna shaǵymdandy. «Másele óte ózekti. Malǵa azyq tappaı otyrmyz. Aınaladaǵy jerdiń barlyǵy jeke menshikte. Ieleri bul jerge mal jaıýǵa ruqsat bermeıdi, al ózderi de bul jerdi paıdalanbaıdy», dedi aýyl turǵyndarynyń biri Amantaı Qupanov.

Nura aýdanynyń ákimi Aıan Shalmaǵambetovtiń aıtýynsha, búgingi tańda jaıylymdyq jerlerdi tıimsiz paıdalaný faktileri oryn alyp otyrǵany ras. Aýdan ákimdigi júrgizgen tal­daý nátıjesi boıynsha jeke qosal­qy sharýashylyqtaǵy 75 myń bas mal úshin 641 myń gek­tar jaıylym qajet ekeni anyq­taldy. Bul rette 261 myń gektar jaıylym jer tapshy. Tek alty aýyldyq okrýg boıynsha jaıylym máselesi 100% sheshilgen.

«Aýyldaǵy birden-bir tabys kózi jaıylymǵa tikeleı táýeldi mal sharýashylyǵy ekenin túsi­nýimiz kerek. Biraq jerdiń kóp­tigine qaramastan ár aımaqta aýyl turǵyndaryna mal jaıýy úshin jer jetispeıdi. Al osy eldi mekenderge jaqyn jerler tozyp ketken. Búgingi tańda elimizdegi jaıylymdyq jerlerdiń jalpy qajettiligi 22 mln gektardy quraıdy. Aýyldyq jerlerde halqymyzdyń jartysyna jýyǵy turatyndyqtan Amanat bul máselege erekshe nazar aýdarady», dep atap ótti partııa hatshysy Eldar Jumaǵazıev.

Máseleni júıeli túrde sheshý úshin partııalyqtar aýyl ákimderi óz deńgeıinde sýarý jáne jerdiń degradasııasy problemalaryn sheshe alatyndaı qoldanys­taǵy zańnamaǵa ózgerister engizý qajettigin atap ótti.

Atap aıtqanda, jaıylym­dardyń tozýyna jáne shóleıt­tenýine qarsy kúres jónindegi bıýdjettik baǵdarlamany oblystyq deńgeıden aýyldyq okrýgter ákimderiniń deńgeıine berý, mal basyn eskere otyryp, jaıylymdardyń jalpy alańyna túsetin júkteme normalaryn jańartý, eldi meken shekarasynan 5 km radıýsta aýyl sharýashylyǵy taýaryn óndirýshilerge jaıylym berýge tyıym salý usynylady.

Nura aýdanyndaǵy prob­lemany sheshý úshin ákim Aıan Shalmaǵanbetovke jaıylymdyq alqaptarda halyqtyń mal jaıýyn qamtamasyz etýge aýyl sharýashylyǵy taýaryn óndi­rýshiler, aýyl ákimderi jáne jergilikti qoǵamdastyq arasynda memorandým jasasý tapsyryldy. Sondaı-aq aýyldar men kentterdiń ákimderine shal­ǵaıdaǵy mal sharýashylyǵy úshin bosalqy jerlerden ýaqyt­sha aqysyz jer paıdalaný qu­qyǵymen alqaptar berý tapsyryldy. Bul másele partııanyń erekshe baqylaýyna alyndy.