Jetpistiń jelkesindegi aqsaqal Qyzylorda, Túrkistan, Shymkent, Taraz, Almaty, Taldyqorǵan qalalaryn basyp ótip, 3 000 shaqyrymdy artqa tastaǵan eken. Alda áli Altaıdan Aqtaýǵa deıingi 5 000 shaqyrym jatyr. Shapsa, tulpardyń tuıaǵy tozatyn, ushsa, suńqardyń qanaty talatyn – qazaq dalasyn jaıaý-jalpy basyp ótý ońaı emes. Onyń ústine súıregen qol arbasy bar. Jaıaýǵa arbany qoıyp, qolsaǵattyń ózi júk. Sonyń ózinde, kúnine qyryq kılometrdi baǵyndyryp jiberedi eken. Kúnniń jaryǵynda eldi mekenge ilinse, ilindi, áıtpese, dalada shatyryn tigip, qona ketedi. Aqsaqal úshin jeti qarańǵyda aıdalada qonyp jatý emes, jol boıyndaǵy josylǵan kólikter qaýipti.
– Qıyndyqtar kezdesse de, moıymaı alǵa basyp kelemin. Eń qorqynyshtysy, janyńnan gý etip, óte shyǵatyn júk kólikteri ushyryp kete jazdaıdy. Ony qoıshy, bastysy, barǵan jerimde halqym qushaq jaıa qarsy alyp, qonaqjaılyq tanytyp jatyr, – deıdi Sársenbaı Ospanuly.
Iá, jaıaýlap kele jatqan arbaly aqsaqaldy kórgen júrgizýshiler syılastyq tanytyp, aqyryndaý kerek te shyǵar... Qara joldyń boıy qalaı degenmen, qaýipti. Qıyndyq demekshi, aqsaqalǵa Ulytaýdan Qyzylordaǵa, Taldyqorǵannan О́skemenge deıingi jol ońaı soqpaǵan kórinedi. Oıdym shuńqyr, shań-tozań deıdi. Jóndeýi saǵyzdaı sozylǵan О́skemen – Taldyqorǵan tas joly arbany qoıyp, aıaqkıimdi tozdyrady eken. Temir synyp, etik tozyp jatqanda, adam jany netken siri deısiń. Til-kóz tasqa. Qarııaǵa qudaı qýat berip, mejeli jerine jetse eken dep tileımiz. Sońǵy núktesi – Aqtaý. Oǵan Sársenbaı Ospanuly bıyldyń qazan aıynda jetemin dep josparlap otyr.
О́skemenge bir kún aıaldaǵan aqsaqal ólketaný murajaıynda bolyp, Shyǵystyń tarıhymen, kórikti jerlerimen tanysty. «Ulytaýǵa bardyń ba?» atty sapardy aıaqtaǵan soń aqsaqaldyń armany – Mekkege jaıaý barý. Iá, Sársenbaı Qotyrashovtyń qaıtpas qaısarlyǵyna qarasaq, erteń-aq qaǵbanyń qaqpasynan tabylatyn sııaqty.
Shyǵys Qazaqstan oblysy
