Sońǵy úsh jylda elimizde aýyl sharýashylyǵy taýar óndirýshileriniń saqtandyrýǵa degen qyzyǵýshylyǵy artyp keledi: 2020 jyly 93 kelisim jasalsa, bıyl 5 aıdyń ishinde 184 saqtandyrý jónindegi kelisimge qol qoıyldy.
2004 jyldan beri qoldanysta bolǵan saqtandyrý júıesi mindetti bolatyn jáne tek eginshilikti qamtyǵan. 2020 jyly júıe erikti mehanızmge aýysyp, agrosektordyń kez kelgen baǵytyn saqtandyrýǵa jol ashty. Qazirgi saqtandyrý ónimderi ósimdik sharýashylyǵyn jańbyr men qýańshylyqtan saqtandyrýmen qatar iri qara, jylqy, qoı, qustardy da saqtandyrýdy qamtıdy.
Memleket tarapynan saqtandyrý syıaqylaryn sýbsıdııalaý túrinde qoldaý beriledi, bul sharýanyń shyǵynyn tómendetýge múmkindik beredi. Saqtandyrý kelisimi baǵasynyń 50%-yn sharýa tólese, 50%-yn memleket sýbsıdııalaıdy. Bul maqsatta eki jyldyń ishinde 3,5 mlrd teńge bólindi.
Elimizdegi agrosaqtandyrý júıesine álemdik saqtandyrý naryǵynda «A» reıtıngi bar halyqaralyq qaıta saqtandyrý kompanııalary tartylyp otyr. Olar otandyq kompanııalar ózine alǵan táýekelderdi qaıta saqtandyrady. Bul saqtandyrý jaǵdaıy týyndaǵan kezde kepildendirilgen tólemdi qamtamasyz etedi.
2021 jyldyń jeltoqsan aıynan bastap agrosaqtandyrý operatory – «Báıterek» holdınginiń enshiles uıymy sanalatyn Agrarlyq nesıe korporasııasy bolyp bekitildi.
Jyl sanap agrosaqtandyrýǵa degen qyzyǵýshylyq artyp keledi. 2020-2021 jyldary 254 kelisimshart jasalyp, 265,7 myńnan astam gektar alqap, 2,6 mln túlik (onyń ishinde iri qara, usaq mal, jylqy jáne qustar) saqtandyrylǵan. Bıylǵy 5 aıda 184 kelisim jasalyp, 308 myń ga alqap pen 60 myńnan astam túlik saqtandyryldy.
2020-2021 jyldary aýyl sharýashylyǵy taýar óndirýshileri saqtandyrý kelisimderin jasaýǵa 350 mln teńge jumsaǵan. Buǵan memlekettik sýbsıdııalaý retinde 350 mln teńge qosyldy. Sóıtip saqtandyrý jaǵdaıy týyndaǵan kezdegi sharýalarǵa tólengen qarjy kólemi 1 mlrd 333 mln teńgege jetti.
Bıylǵy 5 aıda tólengen sýbsıdııa kólemi 500 mlrd teńgeden asyp otyr. Meılinshe avtomattandyrylǵan júıede eshqaıda barýdyń qajeti joq, elektrondy sıfrly qoltańbamen www.qoldau.kz platformasy arqyly saqtandyrý úshin shart jasasýǵa bolady, dep habarlady «Agrarlyq nesıe korporasııasy» AQ baspasóz qyzmeti.
