Ońtústik Qazaqstanda «Balapannyń» nesibesine ortaqtasqandar anyqtaldy

ShYMKENT. 23 sáýir. Ońtústik Qazaqstan oblysynda «Balapan» baǵdarlamasyna qatysty kóptegen zań buzýshylyqqa jol berilgen. Oblystyq prokýratýra qyzmetkerleri anyqtaǵandaı, bıýdjet qarjysy, dúnıe-múlik talan-tarajǵa túsken. Bul týraly «Ekspress K» habarlady. Oblystyń Maqtaaral, Saıram jáne Saryaǵash aýdandaryna júrgizilgen tekserýler barysy mektepke deıingi daıarlaý mekemelerinde aty-jóni tirkelgen, biraq ózi «kórinbeıtin» balalardyń bar ekeni belgili boldy. Máselen, Maqtaaral aýdanyndaǵy «Alıza-Aıan» balabaqshasynda 2012-2013 jyldary Quraltaı atty ul bala mekeme esebine alynyp, sol úshin memleket tarapynan 206 myń teńge bólingen. Al shyn máninde ondaı bala balalar baqshasynyń tabaldyryǵynan da attamaǵan. Osylaısha, Quraltaıdyń qajetine jumsalýy tıis qarjyny mekeme basshysy ımenbeı ıemdengen tárizdi. Dál osyǵan uqsas jaǵdaılar birneshe balalar mekemesinde kezdesken. Endi tıisti oryndar osy keleńsiz áreketterge baılanysty túbegeıli tekserý júrgizip, kúdiktilerdiń ústinen qylmystyq is qozǵamaq. Al Tóle bı aýdanyndaǵy «Alataý» atty mekteptiń janyndaǵy shaǵyn ortalyqtyń qyzmetkerleri arasynan úıinde jatyp eńbek aqy alatyn pysyqaı tabylǵan. Máselen, shaǵyn ortalyqta jumys isteıtin Isataev degen azamat dırektordyń «myrzalyǵy» arqasynda  shybyq basyn syndyrmaı-aq osy ýaqytqa deıin barlyq jıyntyǵy 311 myń teńge jalaqy alǵan. Tekseristen keıin ile mekeme jetekshisiniń ústinen qylmystyq is qozǵaldy. Al kórsetilgen, ıaǵnı, zańsyz tólengen qarjy túgeldeı memleket esebine qaıtaryldy. Ordabasy aýdanyndaǵy «Raýshan» bala-baqshasyn teksergende, quny 3 mln. teńgeni quraıtyn dúnıe-múliktiń joq ekeni anyqtalǵan. Iаǵnı, arnaıy bólingen qarjyǵa qajetti jabdyqtar satylyp alynbaǵan nemese mekeme basshylyǵy ıemdengen. Osy zańsyz tirligi úshin «Raýshan» bala-baqshasynyń meńgerýshisi shartty túrde 2 jylǵa bas bostandyǵynan aıyryldy. Joldybaı Bazar. Derekkóz: «Ekspress K». Foto: Oo.ss.kz.