Qazir ol jerdegi qaraqat qarań qalypty. Qurýǵa aınalǵan. Keıingi býyn qaraqat teremiz dep taldaryn syndyrǵan, japyrǵan, julǵan, qysqasy buta, talyna qaramaı byrt-byrt úzgen be, áıteýir quryp ketýdiń aldyna aparǵan. Jáne tamyz týmaı shildeniń belortasynda, pispeı turyp typ-tıpyl qylyp ketetin kórinedi. Múmkin sodan tuqym shashyp úlgermeı me eken, beımálim. Osyǵan qarap tabıǵatpen úılese almaıtyn, sanasy iship-jeýdi, molyraq qamtyp qalýdy ǵana biletin ashkóz urpaq keldi me dep shoshısyń. Áıtpese ne kórindi?
Kezinde qaraqatqa tunyp turatyn ol jerler. Japyraqtary da biryńǵaı jasyl emes, qyzǵylt, kúreńge kelińkireıtin. Úlkender temirjol boıyndaǵy aǵashtardyń kóbin Karlag tutqyndary otyrǵyzǵan deıtin. Jandy sóz. Tutqyndar jemis aǵashtarymen qosa egin, júgeri, taǵy basqa dándi daqyldardyń neshe atasyn ekken. Nebir agronom, baǵbandar bylaı tursyn, qaı salanyń bolmasyn jiligin shaǵyp, maıyn ishken ǵalymdar otyrǵan tutqynda. Ekinshi jaǵy – tegin jumys kúshi. Onyń ústine biz qaraqat teretin Sarysý ózeninen ári 20 shaqyrymdaı jerdegi Burma aýyly Karlag-tyń bir núktesi bolǵany aıtylady. Mańaıyndaǵy jazyq jerdiń bári terek pen tal, egistikke qar toqtatý úshin otyrǵyzsa kerek.
Qaraqatty tamyzdyń basynda ystyqta teretinbiz. Qoshqyl-qara, qyzyl tústi, terý de ońaı emes. Itshilegen eńbek. О́nbeıdi, kúshke kónbeıdi. Buta-butanyń arasynda eptep otyrǵanyń. Kún bolsa ystyq. Móldiregen jemisti qatty qysyp jiberseń eziledi, túbinen julqysań butasyn syndyryp alasyń, japyraǵyn julmaý kerek degendeı. Olaı etpeýdiń bárin úlkenderden úırendik. Syndyryp, japyraǵyn úzip almaýdy. Bertinirekte eshkim aıtpaıtyn bolǵany da, shamasy. Tań ata kiriskende keshke deıin orta ne bir shelek teresiń-aý. Álgindeı eptep, talyn qıratpaı tergendikten ol da. Áıtpese julmalap, saýyp-saýyp alý kimniń qolynan kelmesin? Al endi sol jabaıy qaraqattyń tosaby bar ǵoı, boıǵa qan júgirtip, jan beredi keýdege. Iisi burqyrap, keýdeni ashady. Dáminen áldebir asaýlyq pa, minez baıqalatyn. Odan keıin tosaptyń neshe atasyn tattyq qaladan. Tátti bolǵanymen, álgindeı bir erekshelik baıqala qoımaıdy. Sony otap, taptap joq qylýǵa aınalǵan jurtqa ne deýge bolady? Bireýlerdiń qaraqattaı móldir balalyǵy qalǵan sol jerde. Ol qaraqat baıaǵydaı syńsyp tursa, qanshama býyndy qýattandyrar edi. Qanshama jannyń túrli aýrýlaryna em bolary taǵy bar. Qasıeti kóp qoı, kóp.
«Tarta jeseń taı qalar» degen qazaq. Taptaı berseń, túk qalmasy osydan baıqalady.
