Endi myna qyzyqty qarańyz, bıyl birinshi ret Úrjar aýdandyq aýrýhanasynyń aýlasyndaǵy kádimgi qaraǵash gúl atypty. Qyzǵylt gúl. Qaraǵashtyń qyryqtan astam túri bolǵanymen, dál bul túri kúzdiń kúni japyraǵy túsedi. Alaıda jazdyń kúni gúl atpaıtyn. Jýyqta úrjarlyq áleýmettik jeli qoldanýshysy qaraǵashty beıne kameraǵa túsirip alyp, elý jyl ǵumyrynda gúldegen qaraǵashty kórmegenin aıtqan. Shynynda da, túıir tastaı bermeıtin usaq japyraqty qaraǵashtyń gúldeýi óte sırek qubylys.
Negizi qaraǵash jerdiń qońyrjaı beldeýlerinde kezdesedi. Elimizdiń dalaly jerinde, saı-salalarda, ózen-kóldiń jaǵalaýlarynda ósedi. Jalpy, 40 túri bolsa, onyń tórteýi qoldan ósiriledi. Bulardyń eń kóp taraǵany – jyltyr qaraǵash. Materıaldyq aǵash úshin qatty bolǵanymen, qasıeti zor sııaqty. Ásirese, sheberlerdiń qaraǵashtan jasaǵan dombyrasyna suranys kóp. Baǵasy da barshylyq. Bul aǵashtyń japyraqtary men jas butalarynyń qabyǵyn emdik maqsatta da paıdalanady eken. Sonymen qatar kógaldandyrý úshin, ańyzaq jelge tosqaýyl bolý úshin de egedi.
Taǵy biri qyzyǵy, qaraǵash gúldese, japyraǵy shyqpaı turyp gúlder edi. Alaıda aýrýhana aýlasyndaǵy qaraǵash japyraǵy shyqqan soń gúl atqan.
Qut daryp, baq taımaǵan órisinen,
Keshegi babalardyń teri sińgen.
Úrjardy shyr aınalyp kete almaısyń,
Tatsań sen jalǵyz túıir jemisinen, dep jazǵan jergilikti aqyn Jabaıyl Beısenov.
Beınetaspaǵa tartyp alǵan azamat ta belgili aqynnyń óleńin oqyp, Úrjarda jemis aǵashy túgili qaraǵash gúldeıtinin aıtyp, Úrjar jerin maqtan etedi. Ras, bul óńirge shybyq shanshysań tal, gúlin tartsań bal shyǵady.
Abaı oblysy,
Úrjar aýdany
