Elimizde spırtti ishimdikterdiń satylý oryndary men satý ýaqyty shekteledi

ASTANA. 23 sáýir. Qazaqstanda spırtti ishimdikterdiń satylý oryndaryn jáne satý ýaqytyn shekteý qarastyrylady. Bul týraly Parlament Májilisinde aıtylǵan Premer-Mınıstriniń orynbasary-Qarjy mınıstr Baqyt Sultanovtyń sózine silteme jasaǵan egemen.kz tilshisi habarlady. Áńgime «Qazaqstan Respýblıkasynyń keıbir zańnamalyq aktilerine etıl spırti men alkogol óniminiń óndirilýin jáne aınalymyn memlekettik retteý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda qozǵaldy. Osy máselege baılanysty baıandama jasaǵan B.Sultanovtyń aıtýynsha, Dúnıejúzilik densaýlyq saqtaý uıymy júrgizgen zertteýler spırtti ishimdikterdi tutyný jónindegi reıtıngte Qazaqstan 188 eldiń arasynda 34-orynda tur. Árbir qazaqstandyqqa shaqqanda, tutyný kórsetkishi jylyna ortasha eseppen 5,5 lıtr taza etıl spırti nemese 11 lıtr araqtan keledi. Osylaısha Qazaqstan Ortalyq Azııa óńirinde eń kóp ishetin el retinde áıgilenip otyr. Tipti, Elbasynyń ózi  arnaıy tapsyrma da bergeni málim. Osyǵan oraı kúshti alkogol ónimderin satý  meıramhanalar, dámhanalar men barlardy qospaǵanda, jumys jáne demalys kúnderine bólinbesten keshki saǵat 21-den bastap, kelesi kúngi 12-ge deıin satýǵa tyıym salynatyn bolyp sheshildi. Negizinen mundaı shekteý 30 gradýstan joǵary spırttik ishimdikterge qatysty. Al kúshtiligi tómen alkogol ónimderine burynǵysha túngi 23-ten tańǵy 8-ge deıin tyıym salyna beredi. Vıse-premer sondaı-aq bazarlarda, kóterme saýda oryndarynda, dúńgirshekterde jáne belgilenbegen oryndarda alkogol ónimderin satýǵa ruqsat etilmegendigin de qaperge sala ketti. Budan basqa, densaýlyq saqtaý, bilim berý, balalar mekemeleri, dene shynyqtyrý-saýyqtyrý jáne sport ǵımarattarynda alkogol ónimderin satýǵa tyıym salynǵan. Ásirese, janarmaı quıý beketterinde sprıttik ishimdikter satýǵa ruqsat etilmeıdi. Bıznes sýbektilerin kontrafaktilik jáne zańsyz alkogol ónimderin satyp alýdan saqtandyrý maqsatynda eseptik-baqylaý tańbalarynyń  durystyǵyn anyqtaıtyn quraldardy engizý zańdyq qujatta kórinis tapqan. Asqar Turapbaıuly. Derekkóz: egemen.kz. Foto: www.inform.kz.