Medıa-forým ózara túsinistik pen senimdi nyǵaıtady

Qazaqstan Respýblıkasynyń Prezıdenti N.Nazarbaev XII Eýrazııalyq Medıa-forým qatysýshylaryna quttyqtaý joldady, dep habarlady Prezıdenttiń baspasóz qyzmeti. XII Eýrazııalyq Medıa-forýmnyń qatysýshylary men qonaqtaryna shyn júrekten ystyq yqylasymdy bildiremin. Búgingi konferensııanyń ashylýyna baılanysty meniń shynaıy quttyqtaýymdy qabyl alyńyzdar! Osy jyldar ishinde Forým halyqaralyq turǵydan keńinen tanyldy, jedel ózgerip jatqan álemniń eń ózekti problemalaryn talqylap, olardy sheshýdiń jańa tásilderin ázirleýdiń moıyndalǵan alańyna  aınaldy. Onyń jumysyna 12 jylda álemniń 60 elinen 5 myńnan astam sarapshy, saıasatker, jýrnalıst jáne qoǵam qaıratkerleri qatysty, forým jumysyn 500-den astam qazaqstandyq jáne sheteldik BAQ jarııalap kórsetedi, delingen quttyqtaýda. Bıyl meniń Eýrazııalyq ekonomıkalyq odaq jónindegi ıdeıany usynǵanyma 20 jyl toldy. Medıa-forým Eýrazııa halyqtarynyń jaqyndasýy men jan-jaqty yntymaqtasýynyń belsendi bastamashysy retinde tanylǵan  Astanada ótýiniń erekshe sımvoldyq máni bar. Bizderdi tereń tarıhı jáne ulttyq-mádenı baılanystar men aýqymdy iskerlik qarym-qatynastar biriktiredi. Eýrazııalyq ıntegrasııa úderisi búginde damýdyń múlde jańa kezeńine shyqty. Eýrazııalyq ekonomıkalyq odaq qurý týraly tarıhı shartqa 2014 jyly mamyrda dál osy jerde, Astanada qol qoıý josparlanýda. Eýrazııalyq  Medıa-forýmnyń  elder  men   qurlyq­­tar arasyndaǵy senim ahýalyn qalyptastyrýdaǵy, ultaralyq tatýlyq pen kelisimdi saqtaýdaǵy aıryqsha róli men mıssııasyn atap ótkim keledi. Búgingi forým kúrdeli halyqaralyq-saıası jaǵdaı tusynda ótip otyr. Sońǵy aılardaǵy kóptegen oqıǵalar etnosaralyq tatýlyqty saqtaýdyń mańyzdylyǵyn taǵy da kórsetip berdi, delingen quttyqtaýda. Bul úderiske Qazaqstan óziniń beıbitshilik pen birlikti qamtamasyz etý jónindegi oń tájirıbelerine súıene otyryp, laıyqty úlesin qosyp keledi. Bizdiń elimizde 100-den astam ult ómir súrýde.  Eldegi myzǵymas qundylyqtar jáne memlekettik saıasattyń basty basymdyqtary bolyp sanalatyn tatýlyq pen turaqtylyqtyń arqasynda biz «Qazaqstan-2030» Strategııasyn merziminen buryn oryndadyq. Elde búginde Qazaqstannyń 2050 jylǵa deıingi damýynyń Strategııasy qyzý júzege asyrylýda. Ultaralyq jáne konfessııaaralyq kelisimdi nyǵaıtý, tatýlyq, birlik turaqtylyq onyń negizgi basymdyqtary bolyp sanalady. Kelesi 2015 jyl Qazaqstan halqy Assambleıasy­nyń jyly bolyp jarııalandy, Astanada Qazaqstan halqynyń forýmy ótetin boldy. Sondaı-aq, 2015 jyly bizdiń elimizdiń astanasynda Álemdik  jáne dástúrli dinder kóshbasshylarynyń 5-shi sezi ótedi. Medıa-forým aıasyndaǵy syndarly suhbattar ózara túsinistik pen senimdi odan ári nyǵaıtýǵa septigin tıgizedi dep senemin. Elbasy quttyqtaýynyń sońynda forýmǵa qatysýshylar jumysyna  jemis jáne barshaǵa tabys tiledi.