Ulttyń uıysýy

Búgin Ulytaýda bas qosatyn tarıhı quryltaıda da qazaq bolyp qamdanýdyń bir qamy qolǵa alynyp jatyr. Bul da – túptep kelgende alashtyqtar ańsaǵan ulttyq memleket qurýǵa jasalǵan qadamnyń, ult múddesin bekemdete túser alǵysharttardyń biri.

El Prezıdenti Ulttyq qu­ryl­taı qurý týraly Jar­lyqqa qol qoıyp, onyń erejesi men quramyn bekitti. Quryltaıdyń quramyna erkin oıly, táýelsiz, aıtary bar azamattar endi. Eń bas­tysy, buqara men bılik arasynda dıalog ornatýdyń tıimdi te­tigi oń jolǵa qoıyldy. En­digi mindet – ult bolyp uıy­­sýdyń jolyn anyqtaý, el taǵ­dyr tarazysynyń qaı ba­ǵyt­qa bet alǵanyn sarap­tap, oń jolyn kórsetý. Al tutas bir memlekettiń taǵ­dyr tarazysynyń qaıda qa­rap aýatyny bılik basynda otyr­ǵan azamattar men ha­lyq taǵ­dyryna jaýapty tulǵa­lar­dyń taǵdyrsheshti máseleni qalaı tarqataryna baılanysty. 

Ulttyq quryltaı eldik iste birligi bekem, irgesi ajy­­ra­maıtyn bútin bir qury­­lymǵa aınala ala ma? Shyny kerek, baıraqty bas­ta­manyń basy-qasynan ta­byl­ǵan ultjandy azamat­tardyń, eldiń muń-muqta­jy men halyqtyń máse­le­­sin jetkizip júrgen tulǵa­lar­dyń aty-jónin oqyǵannan keıin bul suraqqa da jaýap tabylǵandaı boldy.

Ulttyq quryltaıdyń al­ǵashqy jıyny qazaq úshin qasıetti meken – Ulytaýdan bastaý alýynyń ózi kóńilge senim uıalatady. Bile bilgenge bul da úlken jaqsylyqtyń belgisindeı. Ýaqyt talaby men kún tártibine qoıylǵan suraqtarǵa oraı quryltaı quramy ózgerip turatyny – durys úrdis. Onyń ústine qarapaıym jurt quryltaıǵa degen usynys-tilegin joldaı alatyn arnaıy onlaın-platforma qurylatyny – qoǵamdaǵy ózekti máseleniń eshqaısysy qaltarysta qalmaıdy degendi bildiredi.

Memleket basshysy referendým qorytyndysy bo­ıynsha Qazaqstan halqyna jasaǵan úndeýinde Ulttyq quryltaı qurý týraly bas­tama kóterip, osylaısha aza­mat­tardyń memleket isine at­salysý múmkindigi arta túse­tinin aıtqan edi. «Shyn mánin­de, elimizdiń taǵ­dyry – ár­qaı­symyzdyń qoly­myzda», dedi bul jónin­de Prezıdent. Al quryl­taıda «jalpyulttyq qun­dy­lyqtardy nyǵaıta otyryp, qoǵamdy odan ári uıys­­tyrýǵa baǵyttalǵan uzaq­mer­­zimdi máseleler tal­q­y­la­natynyn» eskere­tin bolsaq, bul mańyzdy qadamda da Jańa Qazaqstannyń irgetasy qalanyp jatqanynyń taǵy bir dáleli bolar.

Sóz basynda Alash arys­tary­nyń qazaq qoǵamyn uıym­dastyryp, sońynan ertip, memlekettik ıdeıa taratýdy quryltaı arqyly iske asyrǵysy kelgenin aıt­tyq. Tarıhta qazaq jerin­de 60-tan astam quryl­taı ótkeni belgili. Ár quryl­taıda alash­tyqtardyń jan­kesh­tiligi jatyr. Halyqty bir­lik­ke bastaǵan ár jıyn­nyń ar­qalaǵan júgi bar. Onyń eń bastysy – el bolashaǵyn jar­qyn etý, halyqtyń ósip-órkendeýine sep bolý. En­deshe Ulytaýdan bastaý al­ǵan bul Ulttyq quryltaı el taǵ­dyryna yqpal eter jıyn­ǵa aınalsyn dep tileımiz.