О́zbekstan Premer-Mınıstri Abdýlla Arıpovpen kezdesý barysynda ónerkásip kooperasııasy, aýyl sharýashylyǵy men tranzıttik-kólik sektoryndaǵy yntymaqtastyq, sondaı-aq sý resýrstary salasyndaǵy ózara is-qımyl máseleleri talqylandy.
2021 jyldyń qorytyndysy boıynsha elder arasyndaǵy ózara saýda-sattyq kóleminiń 33%-ǵa artyp, 4,3 mlrd dollarǵa jetkeni, al bıylǵy 4 aıda taýar aınalymy 24,5%-ǵa ósip, 1,4 mlrd dollar quraǵany aıtyldy.
«О́zara saýda kólemin 10 mlrd dollarǵa jetkizý týraly eki el basshylary qoıǵan mindetti iske asyrý bizden keshendi tásilderdi talap etedi. Ol úshin Qazaqstan men О́zbekstannyń ekonomıkalyq áleýeti jetkilikti. Osyndaı turaqty kezdesýler qazaq-ózbek qatynasyn jańa deńgeıge kóterýge yqpal etedi dep sanaımyn», dedi Álıhan Smaıylov.
Qyrǵyzstannyń Mınıstrler kabınetiniń Tóraǵasy Aqylbek Japarovpen kezdesý aıasynda saýda jáne ınvestısııalar, agrarlyq sektor men sý-energetıka salasyndaǵy ózara is-qımyldy odan ári damytýǵa qatysty ekijaqty yntymaqtastyq máseleleri qaraldy.
«Qyrǵyzstan – óńirdegi negizgi saıası jáne ekonomıkalyq áriptesterdiń biri. Búginde eki el arasyndaǵy ekijaqty baılanystar barlyq salada tabysty damyp keledi», dedi Álıhan Smaıylov.
Kelissóz barysynda ózara saýdada belgilengen maqsattarǵa qol jetkizý úshin kúsh-jigerdi arttyryp, oń dınamıkany saqtaý jáne taýar aınalymyn ulǵaıtý qajettigi atap ótildi.
Tájikstannyń Premer-Mınıstri Kohır Rasýlzodamen kezdesý barysynda saýda-ekonomıkalyq yntymaqtastyq, AО́K-te birlesken kásiporyndar qurý, sondaı-aq ónerkásip pen sý salasyndaǵy ózara is-qımyl máseleleri talqylandy.
Álıhan Smaıylov Qazaqstannyń Tájikstanmen yntymaqtastyqty odan ári jan-jaqty damytýǵa erekshe nazar aýdaratynyn atap ótti.
«Eki eldiń Úkimeti qoıylǵan mindetterdi tabysty oryndap keledi. Birlesken sharalardyń arqasynda 2021 jyly eki el arasyndaǵy taýar aınalymy 1,5 ese ósip, 1,1 mlrd dollarǵa jetti. Endi aldymyzda bul kórsetkishti 2 mlrd dollarǵa deıin jetkizý maqsaty tur. Ol úshin bizde qajetti resýrstardyń bar ekenine senimdimin», dedi QR Premer-Mınıstri.
Eske sala keteıik, búgin «COVID-ten tys jerde – Ortalyq Azııany ádildik negizinde qalpyna keltirý jolynda» taqyrybyndaǵy Turaqty damý maqsattary boıynsha ekinshi óńirlik sammıt jumysyn bastady. Sammıtti QR Úkimeti Eýropalyq odaq pen Azııa damý bankiniń qarjylyq qoldaýymen Qazaqstandaǵy BUU Damý baǵdarlamasymen áriptestikte uıymdastyrdy.
