Forýmnyń ashylý rásiminde QR IIDM Indýstrııalyq damý komıtetiniń tóraǵasy Turar Jolmaǵambetov sóz sóılep, búgingi otandyq kómir ónerkásibi salasynyń ahýaly tóńireginde baıandady. Qazirgi tańda elimizdiń kómir salasy elektr energııasynyń shamamen 70 paıyzyn óndirip, koks-hımııa óndirisiniń tolyq júktemesin qamtamasyz etedi. Sondaı-aq kommýnaldyq-turmystyq sektor men el halqynyń otynǵa qajettiligin tolyq qanaǵattandyrady. Salada 30 myńǵa jýyq adam eńbek etýde.
Sońǵy 30 jyldan astam ýaqytta otandyq kásiporyndar 2,7 mlrd tonnadan astam kómir óndirgen. Shamamen 0,8 mlrd tonna jaqyn jáne alys shetelge eksporttaldy.
Qazir elimizde kómir óndirý baǵytynda 30-ǵa jýyq kásiporyn jumys isteıdi. Olardyń qatarynda «Bogatyr Kómir» JShS, «Vostochnyı» razrezi, «Shubarkól Kómir» AQ, «ArselorMıttal Temirtaý» AQ, «Qazaqmys Koal» AQ, «Qarajyra» AQ, «Maıkýben Vest» AQ sııaqty iri kásiporyndar bar.
Turar Jolmaǵambetovtiń aıtýynsha, Indýstrııa jáne ınfraqurylymdyq damý mınıstrligi úshin ishki naryqty, onyń ishinde halyq pen kommýnaldyq-turmystyq sektordy kómirmen qamtamasyz etý óte mańyzdy.
«О́tken jylytý maýsymynda mınıstrlik sizdermen birlese kommýnaldyq-turmystyq sektordy jáne halyqty kómirmen qamtamasyz etý boıynsha aýqymdy jumys atqardy. Árıne, bul jumys sizderdiń qoldaýlaryńyzdyń jáne óndiristik prosesterdi tıimdi basqarýdyń arqasynda oryndaldy. Osylaısha, tutynýshylardy kómirdiń qajetti mólsherimen qamtamasyz ettik. Bizdiń mınıstrlik úshin kómir salasyndaǵy áleýmettik áriptestik mańyzdy», dedi Turar Jolmaǵambetov.
Búginde mınıstrlik janynda áleýmettik áriptestik boıynsha salalyq komıssııa jumys isteıdi. Onda kómir salasy kásiporyndarynyń ózekti máseleleri, qaýipsiz eńbek jaǵdaılaryn jasaý jáne óndiristik jaraqattanýdy tómendetý boıynsha kompanııalardyń oń tájirıbesi qarastyrylady. Sonymen qatar komıssııa áleýmettik jobalar, kadr jáne basqa da máselelerdi zerdeleıdi.
Sondaı-aq Turar Jolmaǵambetov kómirtekti beıtaraptylyq baǵyty Qazaqstanda kómirdi tereń keshendi qaıta óńdeý jobalaryn iske asyrýǵa jáne kómir hımııa salasyn damytýǵa múmkindik beretindigin atap ótti. Onyń paıymdaýynsha, kómirden suıyq jáne gaz tárizdi otyn alý strategııasyna basa nazar aýdarý qajet.
О́z kezeginde mınıstrlik qosylǵan quny joǵary ónimderdi alý úshin kómirdi tereń keshendi óńdeýge baǵyttalǵan saıasatty árdaıym qoldaıdy.
Sonymen qatar forýmnyń plenarlyq otyrysynda «Taý-ken óndirýshi jáne taý-ken metallýrgııa kásiporyndarynyń qaýymdastyǵy» ZTB atqarýshy dırektory Nıkolaı Radostoves, QR EGTRM Klımattyq saıasat jáne jasyl tehnologııalar departamentiniń dırektory Oljas Aǵabekov, «Qazaqstan elektr energetıkalyq qaýymdastyǵy» ZTB tóraǵasy Talǵat Temirhanov jáne kómir óndirýshi kásiporyndardyń basshylary sóz sóıledi.
