Vıdeo • 17 Maýsym, 2022

Merdigerler Ahmet Baıtursynuly turǵan úıdi buzyp tastaǵan

Bıyl 150 jyldyǵyn atap ótetin Ahmet Baıtursynulynyń kindik qany tamǵan úıdiń irgetasy buzyldy, dep habarlaıdy Egemen.kz «Habar 24» telearnasyna silteme jasap.

Egemen Qazaqstan

Qostanaı oblysy Jangeldın aýdanyna qarasty Sarytúbek aýylynda Ahań ómirge kelgen úıdiń irgetasy bertinge deıin saqtalyp kelgen. Ahańnyń kózindeı sol berik irgetasty merdigerler buzyp tastaǵan. Ornyna sapasyz taspen qabyrǵa salmaq bolǵan. Olardyń bul áreketi jergilikti turǵyndardyń ashýyn týdyrǵan edi.

«Mynaý jerde Ahmettiń burynǵy úıiniń izi bolǵan. Fýndamenti qara shym aralas kesekten salynǵan edi. Mynaý ara peshpen bólingen edi. Sol peshpen bólingen buryshta Ahmet atamyz dúnıege kelgen bolar dep oılaıtyn edik. Al búgin sol belginiń astan-kesteni shyqqan. Izi de qalmaǵan, dymy da qalmaǵan. Ahmettiń ózimizde bar eń sońǵy eskertkishinen aıyrylyp qalyp turmyz», dedi Ahmet Baıtursynuly aýylynyń turǵyny Jaqsybek Ábdisalyq.

Jermen jeksen bolǵan aýmaqta byltyr eki bólmeli úı turǵan. Ony eskertkish retinde turǵyndar 2009 jyly bastapqy keıpindegi irgetastyń ústinen salǵan.

Bıyl mamyr aıynda úı qaıta jańǵyrtylady dep sheshildi. Tender jarııalanyp, merdiger jumysqa kirisken. Biraq 22 mln teńgeniń qurylysy orta jolda toqtap qaldy. Nysanda sapasyz materıaldar paıdalanǵany týraly vıdeolar áleýmettik jelige tarap, daý shyqty. Sodan keıin eki jaqty uıǵarymmen jaýapsyz merdigermen aradaǵy kelisim úzilgen. Oǵan bir tıyn da tólenbegendikten is sotqa jetpedi.

«Buǵan deıingisi saman kirpishten qaıta quıylǵan úı. Bylaısha aıtqanda kóriksiz, zaman talabyna sáıkes kelmeıtin, ári qaraı qalpyna keltirýge múmkindigi joq úı bolatyn. Ol dál Ahmet Baıtursynulynyń týǵan úıi emes. Sonyń irgesiniń negizinde kóterilgen úı. Úlkenderdiń, aýyl adamdarynyń aıtýy boıynsha qalanǵan úı. Sondyqtan Ahmet Baıtursynulynyń týǵan úıi jer betinen ysyrylyp qaldy deýge kelmeıdi. Tarıhı shyndyqqa janaspaıdy», dedi Qostanaı oblystyq mádenıet basqarmasynyń basshysy Erlan Qalmaqov.

Qazir súrilgen aýmaq tegistelip jatyr. Jańa úıdiń qurylysy jobalanyp qoıǵan. Qyrkúıekke deıin salynyp bitýi tıis.

«Joba boıynsha qurylys aýmaǵy 149 sharshy metr. Turǵyn úıdi mýzeı úı etip, qaıta qalpyna keltirý jumystaryn júrgizedi. Jobasy 20 maýsymda alynady. PSD-ny jobalaýǵa 1,2 mln teńge demeýshiler atynan beriledi. Al endi úıdiń quny 37 mln bop tur. Bul ekspertızaǵa deıingi baǵa. Áli de ózgeredi», deıdi Jangeldın aýdany qurylys bóliminiń basshysy Ádilbek Imanǵalıev.

Al Ahańǵa arnalǵan kesene kerisinshe sapaly, ári Jańaózennen ákelingen qymbat tastan salynyp jatyr. Bul jumysqa Aqkól men Ahmet aýyly halqynyń bastamasymen jıylǵan 10 mln teńgege jumsalyp jatyr. Qurylys eki aptadan keıin aıaqtalady. Alystan kóz tartatyn nysannyń aýmaǵy 70 sharshy metr bolady. Al bıiktigi 7 metrden asady.