Poıyz 20 maýsym men 2 qarasha aralyǵynda elimizdiń 67 shalǵaı stansııasyna barady. Tizimde Almaty, Shyǵys Qazaqstan, Pavlodar, Soltústik Qazaqstan, Aqmola, Qostanaı jáne Qaraǵandy oblystary, sondaı-aq úsh jańa oblys – Jetisý, Abaı jáne Ulytaý da bar.
«Salamatty Qazaqstan» – joba boıynsha ekinshi poıyz, sondaı-aq 23 mamyrdan bastap «Járdem» medısınalyq poıyzy elimizdiń shalǵaı aýdandarynda tegin medısınalyq kómek kórsete bastady. «Járdem» jáne «Salamatty Qazaqstan» medısınalyq poıyzdary jalpy sany 60 000 adamdy qamtyp, dárigerlerdiń qabyldaýyna kelý sany 100 000, dıagnostıkalyq emshara 18 000, shaǵyn hırýrgııalyq operasııa 1 200 bolsa, 8 000 adamǵa stomatologııalyq kómek kórsetiledi dep kútilip otyr.
«Salamatty Qazaqstan» medısınalyq poıyzy japon jáne nemis óndirisiniń jabdyqtarymen qamtylǵan. Poıyz keńeıtilgen jalpy jáne bıohımııalyq taldaýlar, rentgenografııa men flıýrografııa, ishki aǵzalar men tamyrlardyń ÝDZ-zertteýlerin, elektrokardıogramma, gastrofıbroskopııa jáne dıagnostıkalyq zertteýlerdiń basqa da túrlerin júrgizýge múmkindik beredi. Sonymen qatar bıyl stamotologııalyq qurylǵylar da jańartylǵan», deıdi «Salamatty Qazaqstan» poıyzynyń aǵa dárigeri Arman Isaınov.
Qyzmetkerler quramy ártúrli beıindegi bilikti mamandardan, atap aıtqanda, terapevt, pedıatr, kardıolog, nevropatolog, okýlıst, LOR, gınekolog, hırýrg, ýrolog, mammolog, stomatolog, rentgenolog, kardıolog, ÝDZ dárigeri, endoskopıst, fýnksıonaldyq dıagnostıka dárigerinen turady. Bıyl medısına mamandarynyń quramyna psıholog jáne dermatovenerolog qosyldy. Jobaǵa barlyǵy 36 maman qatysady. Dárigerlerdiń qyzmeti halyqqa tegin usynylady.
Mamandandyrylǵan medısınalyq poıyz 8 vagonnan turady. Aıta ketsek, dızel-generator vagony qajet bolǵan jaǵdaıda tótenshe jaǵdaı kezinde shaǵyn eldi mekendi elektr energııasymen qamtamasyz ete alady. Poıyzdar respýblıkanyń jetekshi klınıkalarymen telemedısınalyq konsýltasııalar júrgizý úshin telefon baılanysymen, ınternet jelisimen jabdyqtalǵan.
Joba «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qorynyń qarjylaı qoldaýymen, QR Densaýlyq saqtaý mınıstrligi qatysýymen, «Qazaqstan Temir Joly» UK AQ janyndaǵy «Áleýmettik jobalar qory» korporatıvtik qorymen birlesip iske asyrylyp jatyr.
Joba alǵash ret 2010 jyly iske qosylyp, 2019 jylǵa deıin jyl saıyn iske asyrylyp kelgen. Biraq koronavırýs indeti kezinde jumysyn ýaqytsha toqtatty. Osy kezeń ishinde «Densaýlyq», «Járdem» jáne «Salamatty Qazaqstan» atty úsh konsýltasııalyq-dıagnostıkalyq poıyz Qazaqstannyń shalǵaıda ornalasqan 1700-den asa eldi mekenin aralap, 488 881 turǵyndy tekserýden ótkizdi, onyń ishinde 101 614 bala bar. Dárigerler 1 647 138 dıagnostıkalyq em-shara, 11 981 kishi ambýlatorııalyq operasııa ótkizdi. Mammolog mamandar 67 148 áıeldi qabyldasa, jalpy adamdar dárigerdiń qabyldaýynda 2 873 542 ret boldy.
