– Zaısan aýdanynda óńirlik «Bir qabatty Shyǵys» baǵdarlamasy júıeli iske asyrylyp, kópbalaly otbasylar jyl saıyn qonys toıyn toılap jatyr. Basqa aýdandarmen salystyrsaq, turǵyn úılerdiń sany men sapasy bizde kósh bastap tur. Bıyl da 2 páterli 35 úıdi qoldanysqa berýdi josparlap otyrmyz. Atalǵan úıler ortalyq aýyz sý, gaz, elektr jelilerine qosylyp, káriz sý qubyrlary tartylyp beriledi, – deıdi aýdan ákiminiń orynbasary S.Tlemesov.
Jyl saıyn memleket azamattardyń ál-aýqatyn attyrýǵa baǵyttalǵan túrli baǵdarlamalar men jobalardy nátıjeli iske asyryp keledi. Ásirese, shalǵaıdaǵy shekaralyq aýdandardyń áleýetin arttyrý sońǵy ýaqytta basty nazarǵa alynyp otyr. Shekaralyq aýdandardy damytýdyń arnaıy baǵdarlamasy da jasaldy.
– Zaısan aýdany sońǵy 2-3 jylda adam aıtarlyqtaı ózgerdi. Jańa turǵyn úıler boı kóterip, qalanyń sáni men saltanaty jarasty. Zaısan qalasyna kire beristegi kópbalaly otbasylarǵa berilgen 2 páterli úıler bólek bir qalashyq boldy. Týǵan qalamyzdyń kórkeıip, gúldengeni – ár turǵynnyń qýanyshy, – deıdi qoǵam belsendisi Ádilhan Kákeev.
Turǵyn úılerdiń kóp salynýy aýdannyń áleýmettik-ekonomıkalyq jaǵdaıynyń turaqtylyǵynyń aıqyn kórinisi. «Bir qabatty Shyǵys» baǵdarlamasynyń nátıjesinde aýdannyń demografııalyq kórsetkishi jyldan jylǵa artyp, halyq sany ósip keledi.
– Men kópbalaly anamyn. Bıyl kezegim kelip, jańadan salynyp jatqan 2 páterli 35 úıdiń bireýin alatyn boldym. Jańa úıimizdiń bolatynyna balalarym qatty qýanyp júr. Barsha kópbalaly otbasylarǵa osyndaı qýanysh syılap, qonys toıyn toılaý múmkindigin bergen memleketimizge analyq alǵysymdy bildiremin, – deıdi kópbalaly ana A.Omarova.
Atalǵan baǵdarlama kópbalaly analardy qýantyp qana qoımaı, aýdannyń áleýmettik-ekonomıkalyq damýyna úlken áserin tıgizdi. Qurylys zattaryn satatyn dúkenderdiń saýda aınalymy artyp, azamattar jumyspen qamtyldy. Aıta ketsek, endigi salynyp jatqan úıler I, II toptaǵy múmkindigi shekteýli azamattarǵa, jetim balalar men áleýmettik jaǵynan az qamtylǵandarǵa berilmek.
Shyǵys Qazaqstan oblysy,
Zaısan aýdany
