Parlament • 24 Maýsym, 2022

Máýlen Áshimbaev: Reformalardyń basty maqsaty – ádiletti Qazaqstan qurý

28 ret kórsetildi

Senat Spıkeri Máýlen Áshimbaevtyń tóraǵalyǵymen Senatorlar keńesiniń otyrysy ótti. Onda Keńes músheleri «Konstıtýsııalyq reforma – Jańa Qazaqstannyn negizi» taqyrybynda oı órbitti, dep habarlaıdy Egemen.kz.

Otyrysty ashqan Máýlen Áshimbaev búginde Qazaqstan damýdyń jańa kezeńine qadam basqanyn aıtty. Sondaı-aq Memleket basshysy Qasym-Jomart Toqaevtyń bastamasymen Jańa Qazaqstan qurý jolynda keshendi reformalar qolǵa alynǵanyn tilge tıek etti.

«Qazir elimiz úshin óte mańyzdy kezeń. Aýqymdy ári keshendi reformalar qolǵa alynyp, qarqyndy júrgizilip jatyr. Bul reformalardyń negizgi maqsaty ádiletti saıası-ekonomıkalyq júıe qalyptastyrý. Ádiletti júıe degenimiz, birinshi kezekte, zań ústemdigin ornatý jáne azamattardyń bárine birdeı teń múmkindik jasaý. Bul Jańa Qazaqstan qurýdyń negizgi máni ekeni sózsiz», dedi Senat Tóraǵasy.

Sondaı-aq Máýlen Áshimbaev el Prezıdentiniń bastamasymen qolǵa alynǵan jáne referendým kezinde qazaqstandyqtardyń basym bóligi qoldaý bildirgen reformalardy sapaly zańnamamen qamtamasyz etý qazir Palatanyń aldynda turǵan mańyzdy mindetterdiń biri ekenin aıtty. Bul rette aldyńǵy býyn memleket qaıratkerleriniń, onyń ishinde Senatorlar keńesiniń músheleriniń mol tájirıbeleri men bilimi úlken mánge ıe.

Otyrys barysynda Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy Vladımır Volkov baıandama jasady. Ol quqyqtyq salany, onyń ishinde saılaý júıesin, saılaý prosesin jańǵyrtýdyń, quqyq qorǵaý ınstıtýttaryn kúsheıtýdiń mańyzdylyǵyna egjeı-tegjeıli toqtaldy.

«Memleket basshysy usynǵan saıası reformalar irgeli sıpatqa ıe. Olar qoǵamnyń saıası júıeni demokratııalandyrýǵa degen kópjyldyq suranysynan týyndap otyr. Sondaı-aq bul ózgerister azamattardyń memlekettik sheshimderge yqpal etý jáne Jańa Qazaqstan qurýǵa tikeleı qatysý múmkindigin qamtamasyz etýdi kózdeıdi», dedi Vladımır Volkov.

Otyrys kezinde Senatorlar keńesiniń músheleri Tóleýbek Muqashev, Serik Aqylbaı, Georgıı Kım, Dýlat Qusdáýletov jáne Serik Bekturǵanov sóz sóılep, konstıtýsııalyq reformany iske asyrý jónindegi oılarymen bólisti.

 

Sońǵy jańalyqtar

Uqsas jańalyqtar