Kásipqoı boks • 26 Maýsym, 2022

GGG – CANELO: Er kezegi úshke deıin...

1210 ret kórsetildi

Qazaqtyń kók shapanyn jahanǵa tanytqan Gennadıı Golovkın 2006 jyly kásipqoı boksshy retindegi mansabyn bastaǵanda («Universum Box-Promotion» uıymynda) zaý bıikterdi baǵyndyrýǵa umtylǵany aıtpasa da túsinikti. Alaıda promoýterlik uıym basshylary ýádeni úıip-tókkenimen, qazaq oǵlanyn kil «qapshyqtarmen» shyǵardy. Osylaısha, Gennadıı Golovkın birneshe jylyn tekke ótkizdi. Keıin almanııalyq uıymnan ketip, muhıt asty.

HBO-daǵy alǵashqy aıqas

Muhıt asqannan keıin qazaq boks­shysyn HBO nemese Showtime telearnasynan kórgisi kelgenderdiń qarasy kóp boldy. О́ıtkeni dál sol kezeńde atalǵan telearnalardyń bási basym edi. Promoýter Tom Lefflerdiń qasynan tabylǵan qazaq saıypqyrany AQSh rynogyndaǵy HBO telearnasynda judyryqtasýǵa múmkindik aldy. 2012 jyldyń kúreń kúzinde Gennadıı Golovkınniń amerıkalyq telearnadaǵy debıýttik jekpe-jegi joǵary deńgeıde ótti. Polshalyq Gjegoj Proksany birneshe márte rıng tórine sulq túsirgen sańlaq óziniń shyn myqty ekenin dáleldep, Amerıkadaǵy kásipqoı boks fanattarynyń súıiktisine aınaldy.

Gabrıel Rosado, Nobýhıro Isıdo, Mettıý Maklın, Osýman Adama, Denıel Gıl, Martın Mıýrreı, Vıllı Monro, Davıd Leme... Jalǵasaq tizim jalǵasa beredi. Bulardyń bári de Golovkın judyryǵynyń salmaǵyn sezindi. Martın Mıýrreı 11 raýnd shydas berdi, Denıel Djeıkobs Golovkınmen 12 raýnd qolǵap túıistirgen alǵashqy boksshy atandy demesek, bári de jeńilistiń kermek dámin tatty. Genanyń rekordty serııasy ármen qaraı jalǵasty.

Qazaqstandyq boksshy sharshy alańda Mıgel Kotto, Saýl Alvares sekildi álem tanıtyn juldyzdarmen qolǵap túıistirgisi keldi. Odan buryn WBC tujyrymy boıynsha orta salmaqtaǵy álem chempıony, argentınalyq Serhıo Martınespen judyryqtasýǵa nıettendi. Alaıda Serhıo Maravılla Martınes Mıgel Kottony qarsylas retinde tańdap, pýerto-rıkolyq oǵlannan ońbaı jeńildi. Aralyq salmaqta qolǵap túıistirýge mashyqtanyp alǵan Mıgel Kotto qarsylas retinde meksıkalyq juldyz Saýl Alvarespen qolǵap túıistirgendi jón dep tapty. Qarsylasyna upaı sanymen ese jiberdi. Keıinnen Golovkın Alvarestiń mindetti qarsylasy atandy. Alaıda ýaqytty sozýǵa kóshken meksıkalyq boksshy birer aıdan soń chempıondyq beldikti bosatyp bere saldy. Nátıjesinde, Gennadıı Golovkın úsh tujyrym boıynsha álem chempıony ataǵyna qol jetkizdi. Alaıda Golovkınge keregi bul emes edi. О́ıtkeni ol shyn myqty boksshymen ári kásipqoı boks áleminiń jaryq juldyzymen qolǵap túıistirmegen bolatyn. Sol úshin de «Kanelomen» sharshy alańdy bólisýdiń mańyzy zor edi. Al meksıkalyq tek 2017 jyly ǵana sharshy alańǵa shyǵýǵa kelisti. Birinshi shaıqasta qazaqstandyq boksshy basym túskenimen, tóreshiler eki boksshyny «teń túsirdi». Ekeýara ekinshi kezdesý taǵy da ýaqtyly ótpedi. «Kanelo». Klenbýterol. Dopıng daýy. Ýaqyt ótti. Gennadıı Golovkın Vanes Martırasıandy jeńgennen keıin eki boksshy sharshy alańda taǵy kezdesti. Tóreshilerdiń basym daýsymen meksıkalyq jeńiske laıyq dep tanyldy.

Kásipqoı boks – bıznes. О́zin bıznes ımperııaǵa aınaldyra bilgen tańdaýly talanttardyń biri, Meksıka uly Saýl Alvaresti muhıttyń arǵy betindegiler kásipqoı boks áleminiń jaryq juldyzy retinde áý basta moıyndaǵanymen, qazaqstandyqtardyń birazy (psevdofanattar da bar) «Kanelony» Golovkın arqyly tanydy desek, esh artyq aıtpaǵan bolarmyz.

«Aıttym bitti, atqan oq oralmaıdy» degen ustanymdy ustanatyn, sharshy alańda kimmen qolǵap túıistirgisi kelse, sonymen judyryqtasatyn «Kanelo» degen kim edi?! Ol qalaısha álemdegi eń tanymal kásipqoı boksshyǵa aınaldy? Úńilip kóreıik.

On besinde «otqa tústi»

Santo Alvares pen Anno Marııa Barragannyń otbasynda segiz bala dúnıege keldi. Otbasynyń sút kenjesi osy Saýl bolatyn. Ol kezde Santo ákeı Saýldiń aty alysqa ketetinin esh bilgen joq. 1990 jyldyń 18 shildesinde dúnıege kelgen Saýl Alvares bala kúniniń az ǵana bóligin ózi týǵan Gvadalahar qalasynda ótkizgenimen, arada az jyl ótken soń otbasy Hýanakatlan shaharyna qonys aýdardy. Ol áýelde atqa minip serýendegendi unatty. Qazaqtarmen basty uqsastyǵy da sol ǵana shyǵar. Sol kezde Saýl boks týraly múlde oılamaıtyn. Aǵalary boks seksııasyna jazylsa da, «Kanelo» bas aýyrtpaǵan edi. Tek 13 jasqa tolǵanda boksqa qatysý týraly oılana bastady. О́ıtkeni zamandas­tary sary-qyzǵylt shashynan tartyp, mazaqtaı bastaǵan. Urysta turys joq. Saýl bokspen shyndap shuǵyldandy. Boıyn yza men kek jaýlap alǵan. О́zin mazaq qylǵan zamandastaryn ornyna qoıǵysy keledi. Sol kezde bapkerler Hose men Eddı Reınoso sary balaqaıdy qanatynyń astyna aldy. Ony qanattyǵy qaqtyrmaı, tumsyqtyǵy shoqyttyrmaı, mápeledi.

Ol on tórt jasynda birneshe jarysta top jardy. Tipti jasóspirimder arasyndaǵy el chempıonatynda kúmis júldeni moınyna taqty. Kóp oılanǵan joq, on besinde kásipqoı boksqa bet burý týraly shuǵyl sheshim qabyldady. On bes jasynda alǵash ret kásipqoı rıngke kóterilgen oǵlan ózi sekildi tájirıbesi kemshin eki boksshyny ýaqytynan buryn utyp, jeńistiń tátti dámin tatty. Úshinshi shaıqasynda Mıgel Vaskes degen otan­dasyn tóreshilerdiń basym daýsymen jeńgen edi.

«Qapshyqtardy» qırata jeńdi

On besinde kásibı mansabyn bastaǵan bala boksshynyń myqtylarmen judyryqtasýy múlde múmkin emestigi túsinikti edi ǵoı. О́ıtkeni reıtıngte kóterilýi kerek. Sol úshin de yńǵaıly qarsylastar tańdalady. Ol áýesqoı boksta álem chempıony atanǵan emes, Olımpıada oıyndary degenniń ne ekenin de bilmeıdi. Sondyqtan da reıtıngte joǵarylaýy úshin aıtarlyqtaı ýaqyt kerek ekeni aıdaı aqıqat. Al ýaqyt «Kaneloda» jetkilikti bolatyn. Sodan da bolsa kerek, jıyrma shaıqas boıy qatardaǵy «qapshyqtarmen» qolǵap túıistirdi. Besinshi kezdesýinde Horhe Hýares degen otandasymen teń tústi demeseńiz, qalǵanynyń barlyǵynda mereıi ústem bolǵan. Tek...

Tek, tóreshilerdiń ekiushty sheshimimen jeńilgenine kóńili tolmaǵan Mıgel Vaskes kúnderdiń kúninde otandasymen ekinshi ret judyryqtasqysy keletinin málimdedi. Bul 2008 jyl bolatyn. 18 jasqa tolýyna jıyrma kún qalǵanda «Kanelo» qarsylasynyń únin «óshirdi». Ras, nokaýtqa túsire alǵan joq. Biraq Vaskesti soqqynyń astyna alyp, jarqyn mánerde jeńiske jetti. Osylaısha, ekeýara daýǵa núkte qoıdy.

Kottonyń inisi «Kanelony» qulata jazdady

Jyl ótken saıyn sheberligi tolysa túsken Saýl Alvaresti komandasy 2010 jyly salystyrmaly túrde alsaq, myqty qarsylaspen shyǵarýǵa bel býdy. Osylaısha, táýekelge bardy.

Pýerto-Rıko men Meksıka boksshy­larynyń arasyndaǵy jekpe-jek qaı kezde de tartysty ótetin. Bul joly ol Mıgel Anhel Kottonyń inisi Hose Kottomen qolǵap túıistirdi. Eki boks­shy birinshi jartylaı orta salmaq dárejesindegi búkilálemdik boks keńesiniń kúmis beldigin sarapqa saldy. Árıne, ekinshi dárejeli belbeý. Alaıda jıyrma jasar oǵlan úshin shaıqastyń mańyzy zor. Birinshi raýndty qarqyndy bastaǵan Kotto «Kanelony» qulata jazdaǵan bolatyn. Arqan boıy kerilgen rıngti jaǵalaı júrip kúneltken «Kanelo» soıqan soqqy ótkizip alǵanyna qaramastan shydady. Taǵy birneshe soqqy ótkizse de qulaǵan joq. Nátıjesinde, qarsylasyn tehnıkalyq nokaýtpen jeńdi. Odan keıin Alvaresti eshbir boksshy teńselte alǵan joq. «Jaraısyń, Saýl!» degenbiz sol kezde jıyrma jasar boksshynyń tózimdiligine tamsana qol soǵyp.

Budan keıin de «Kanelo» jeńisti jo­ryǵyn sátimen jalǵastyra tústi. 2013 jyly áıgili Ostın Traýtty tóreshilerdiń birjaqty sheshimimen jeńgennen keıin Meksıka uly dáýirdiń daraboz boks­shysy, ataqty Floıd Meıvezermen judyryqtasý múmkindigine ıe boldy. Oǵan deıin búkilálemdik boks keńesiniń tolyqqandy chempıony ataǵyn ıelengen jıren sary jigit 23 jasynda dańqty AQSh oǵlanyn utatynyna senimdi boldy. О́zine qatty sengendikten birneshe márte málimdeme jasap ta úlgerdi. Biraq Floıdqa judyryǵyn kim ala júgirmedi deseńizshi. Bári de keıin sazaıyn tartty ǵoı.

Meıvezer «Kanelony» boks mektebine «apardy»

Erterekte «Kanelonyń» promoýteri Oskar De La Hoııany sabasyna túsirgen Floıd Meıvezer bul joly Saýldi jeńetinine kúmáni bolǵan joq. «Buryn kókeńdi jeńsem, endi seni sabaımyn, bala!» dedi ol baspasóz máslıhattarynyń birinde suq saýsaǵyn shoshaıta sóılep. Floıd sózinde turdy. Jıyrma úsh jasar oǵlandy qarsylas kórgen joq.

Iá, Meıvezer 12 raýnd boıy Saýl Alvaresti soqqynyń astyna aldy. Negizinde shabýyldyń barlyǵan da «Kanelo» bastaıdy. Floıd onyń joıqyn soqqylaryn ótkizip jiberedi de, arqan boıy kerilgen rıngti panalap turyp, birneshe dál soqqysyn tıgizedi. Rıng ortasynda da jaǵdaı dál solaı. Alys qashyqtyqta da, jaqyn jáne orta qashyqtyqta da jaǵdaı ózgergen joq. Saýldiń shabýyldaryn Floıd beske oqyp qoıdy. Al Alva­restiń buryshynda da, ózinde de «V» jospary bolmaǵany birden sezildi. Qysqasy, Saýldiń soq­qy­lary aýa qarmady, demeseńiz, Meı­vezerge túk te daryǵan joq. Alaıda tóreshilerdiń ekeýi 117:111, 116:112 esebimen Meıvezerdiń jeńisin mo­ıyn­dasa, Sı Djeı Ross degen azamat 114:114 esebin tirkep, jankúıerler men boks ma­mandaryn esinen tandyra jazdady.

Bul kezdesýde Alvarestiń eshbir raýndta jeńiske jetpegenin eskersek, tóreshilerdiń biri oǵan úsh, ekinshisi tórt raýndty «tartý» etýiniń ózi eriksiz ezýge kúlki úıirgen edi. Bir sózben aıtqanda, «Kanelodan» juldyz jasaý prosesi dál osy shaıqasta bastalyp kete jazdaǵany daýsyz. Ony kýbalyq Erıslandı Laramen ótken jekpe-jekte de aıqyn baıqadyq. Bul kezdesýde Bostandyq aralynyń sportshysy myqty kóringenimen, tóreshiler 2:1 esebimen jeńisti Alvarestiń enshisine jazyp berdi. Osydan keıin-aq «Kanelony» tek nokaýtpen jeńýge bolatyny taıǵa tańba basqandaı belgili bola tústi. Alaıda jıren saryny sulq túsirý eshkimniń qolynan keler emes. О́ıtkeni ol qarsylas jumsaǵan soqqyny qabyldaı biledi. Tózimdiligimen talaı myqty boksshyny tań-tamasha qylǵanyn kóz kórdi.

Tórt salmaqta top jarǵan sańlaq

Ol orta salmaqqa aýysqanda WBC tujyrymy boıynsha álem chempıony ataǵyna talasty. Joǵaryda jazǵanymyzdaı áıgili Mıgel Kottony tóreshilerdiń birjaqty sheshimimen jeńdi. Dál osy 2015 jyly qazaqstandyq Gennadıı Golovkın onyń mindetti qarsylasy atanǵanyna qaramastan, Alvares babynda júrgen Golovkınmen qolǵap túıistirgendi qup kórmedi. Bir jaǵy jeńilip qalý qaýpi basym ekenin sezdi. Ekinshiden, mundaı úlken shaıqasty jankúıerlerge ábden kúttirip baryp ótkizýdiń mańyzy zor ekenin túsindi. Sonda shaıqas barynsha tabysty bolady. Sóıtti de Ámir Han, Lıam Smıt, Hýlıo Sezar Chaves kishimen qolǵap túıistirdi. Sodan keıin 2017 jáne 2018 jyldary Golovkınmen eki ret sharshy alańda kezdesti. Alǵashqysynda tóreshiler Saýldi qazaq oǵlanymen «teń túsirse», ekinshi jekpe-jekte Meksıka uly jeńis toıyn toılaǵanyn bári biledi. Qalaı desek te, atalǵan kezdesýler tarıhqa aınalyp ketti.

Keıin Rokkı Fıldıng, Denıel Djeıkobsty utqan soń ol ekinshi orta salmaqtaǵy chempıondardy jáne jartylaı aýyr salmaqtaǵy álem chempıony Sergeı Kovalevti jeńip, tórt salmaqta álem chempıony atanyp, tarıhqa atyn altyn áriptermen jazdy. Búginde Alvares ekinshi orta salmaqta álemniń absolıýtti chempıony sanalady.

Sparrıngte syr ańdyǵan Saýl

Otandasymyz Gennadıı Golovkın men meksıkalyq Saýl Alvares ara­syn­daǵy alǵashqy jekpe-jek nege kesh uıymdastyryldy? Osy saýal talaıdy tolǵandyratyny daýsyz. Munyń sebebin 2011 jyly ótken eki boksshynyń arasyndaǵy sparrıngpen baılanystyratyndar az emes.

Ol ýaqytta Gennadıı Golovkındi meksı­kalyq bapker Abel Sanches jattyq­tyratyn. Kúnderdiń kúninde Sanchestiń lagerine Alvares keledi. «Bıg berde» qazaqstandyq bylǵary qolǵap sheberi men Meksıka uly alty raýndtyq sparrıng ótkizedi. Atalǵan barlaý kezdesýin kórgen The Ring jýrnalynyń redaktory Dýglas Fısher oıyn bylaı sabaqtaıdy.

«2011 jyldyń mamyrajaı mamyr aıy áli este. Gennadıı Golovkın men Saýl Alvares sharshy alańda alty raýndtyq sparrıng ótkizdi. Ataýy jaı ǵana sparrıng bolǵanymen, meksıkalyq boksshy baryn salyp baqty. Birneshe joıqyn soqqysyn darytty. Alaıda onyń myǵym soqqylary Golovkınniń ezýinde kúlki úıirdi. Al buryshtardy qıyp, qarsylasyn tyqsyrtqan Gennadııdiń joıqyn soqqylary Alvaresti ábden tıtyqtatty. Bet-júzi órt shalǵandaı qyzaryp ketti. Bir sózben aıtqanda, Gennadıı Golovkın kúshin saqtaı júrip judyryqtasqannyń ózinde desi de, sesi de basym ekeni ańǵarylyp turdy. 29 jasar qazaqstandyq boksshy osylaısha, Saýldi oılandyryp tastaǵan bolatyn», deıdi belgili jýrnaldyń bas sarashysy. Dýglas Fısherdiń sózinen túsingenimiz, Alvares sharshy alańda baryn salý arqyly óziniń shamasyn tekserýge den qoıǵany aıqyn ańǵarylady. Ol bolashaq qarsylasynyń áleýetin osylaısha 2011 jyly barlap kórdi. Mundaı qadamnyń ózi Saýl Alvarestiń bolashaq qarsylasyn zertteýge áýelden ázirlengenin baıqata túsetini daýsyz.

Jalpy, Saýl Alvares sparrıng qar­sylastardy izdep, basqa boksshy­lardyń jattyǵý lagerine barmaıtyny eki bastan málim. Kásipqoı boks áleminiń jaryq juldyzynyń lagerine juptasyp judyryqtasýǵa nıetti bylǵary qolǵap sheberleriniń ózderi aǵylyp kelip jatady. Árıne, ár jekpe-jektegi qarsylastarynyń áleýetine qaraı tańdaıdy olardy. Munyń ózi kóp jaıttan syr sherte tússe kerek. Alaıda «Bıg berge» barý arqyly ol belgili bir deńgeıde qarsylasynyń qarymyn baıqap kórgisi keldi. О́ıtkeni dál sol ýaqytta Alvarestiń birinshi orta salmaqtyń lımıtin jasaı almaı júrgeni týraly aqparat taraı bastaǵan. Soǵan qarap-aq onyń aralyq salmaqta júre bermeı, aldaǵy ýaqytta orta salmaqqa aýysatyny belgili bolǵan edi. Qysqasy, atalǵan barlaý Alvaresti ábden oılandyrǵany daýsyz. 29 jasar Golovkınmen jaqyn arada qolǵap túıistirý tıimsiz ekenin meksıkalyq boks­shy sol kezde anyq túsindi.

Atalǵan sparrıngti tamasha­la­ǵan­dardyń biri reseılik kásipqoı boksshy Ser­geı Kovalev te ýaqytynda óz oıymen bólisken edi.

«Sparrıngtegi jaǵdaı basqasha bolatyny belgili ǵoı. Saýl Alvaresti jerge urýǵa bolmaıdy. Ol baryn salyp baqty. О́zin jaqsy jaǵynan kórsete bilgenine eshqandaı kúmán joq. Al Gennadıı Golovkın sharshy alańda bar múmkindigin kórsetken joq. Ol qajet kezde ózin toqtatyp otyrǵanyn aıqyn baıqadyq. Alaıda sharshy alańda óz áleýetiniń jartysyn ǵana qoldanǵan Gennadıı Golovkınniń Alvares úshin alynbas qamal ekenin bárimiz sezindik. Kózge anyq kórinip turdy. Rasynda da rıngte múmkindigi men tájirıbesiniń jartysyn ǵana kórsetken Golovkın Alvaresten basym tústi. Osylaısha, qazaqstandyq bylǵary qolǵap sheberi óziniń shyn myqty ekenin kórsetti.

Ras, 21 jasar Alvares Golovkınge birneshe soqqysyn darytty. Alaıda Gennadıı Golovkın qarsylasyn birneshe márte shaıqap tastady. Onyń ekinshi raýndta jumsaǵan hýk soqqysyn meksıkalyq qarsylasy sózsiz sezindi. Sondaı-aq baýyr tusyna jumsaǵan birneshe soqqysynan keıin de Saýl Alvares qashqaqtaı berdi. Sońǵy eki raýndta Saýldiń qatty sharshaǵany baıqaldy. Áıtkenmen ol sońǵy kúshin jınap, Genanyń qolyn baılap júrip, sparrıngti sońyna deıin jetkizdi. Bul eki boksshyny sharshy alańda kezdestirý kerek. Jankúıerler úshin tamasha shaıqas bolady. Bárimiz Gennadıı Golovkın men Saýl Alvares arasyndaǵy jekpe-jekti kórgimiz keledi», dedi Sergeı Kovalev ýaqytynda óz pikirin bildirip.

Bul pikirlerden qandaı qorytyndy shyǵarýǵa bolady? Álbette, Alvarestiń komandasy Golovkınniń birneshe jyl joǵaltqanyn kútti. Bul kásipqoı boks áleminde qalyptasqan úrdis ekeni barshaǵa málim. Myqty boksshynyń jasy shaý tarta bastaǵanda jarqyrap shyqqan juldyzdar onymen sharshy alańdy bólisýge kelisedi. Saýl de sóıtti. Urymtal sátti utymdy paıdalanǵysy keldi. Alaıda birinshi shaıqasta Golovkınniń fızıkalyq áleýeti men tehnıkalyq sheberligi áli de joǵalmaǵanyn kóz kórdi. Al Sergeı Kovalev sol Alvaresten nokaýtpen jeńilis tapty.

Jaqynda ǵana reseılik Dmıtrıı Bıvoldan jeńilgen Saýl Alvares qyrkúıekte Gennadıı Golovkınmen úshinshi ret qolǵap túıistirmek. Bul kezdesýdi kásipqoı bokstyń shyn jankúıerleri men mamandardyń asyǵa kútip júrgeni daýsyz. Eger úshinshi shaıqasta qazaq oǵlany jeńiske jetse, eki boksshy tórtinshi ret sharshy alańda kezdesýi yqtımal. Ýaqytynda Hýan Manýel Markes pen Mennı Pakıao sharshy alańda tórt ret judyryqtasqan edi ǵoı. Búgingi tańda kásipqoı bokstaǵy eń kassalyq jekpe-jek Alvares – Golovkın kezdesýi ekeni daýsyz. Kásipqoı boks – bıznes. Boksshylardan bárin kútýge bolady.

P.S. Iá, Saýl Alvares kásibı mansabynda eki ret jeńilistiń ashy dámin tatty. Mamyr aıynda jartylaı aýyr salmaq dárejesindegi WBA tujyrymy bo­ıynsha álem chempıony, reseılik Dmıtrıı Bıvol meksıkalyqtyń mysyn basty. Ol Saýlmen ınfaıtqa (qoıan-qoltyq urys) kóp barǵan joq. Kásipqoı boksshy bolǵanyna qaramastan, áýesqoı rıngtegi stılin aralastyra otyryp judyryqtasty. Al ınfaıtta qalǵan sátterde saýatty qorǵandy. Qorǵanystan keıin shabýyldady, nátıjeli shabýyldan keıin qaýipti aımaqtan lezde ketip qalyp jatty. Bul – sheberlik.

Alvares osy jeńilisten keıin de kásipqoı boks áleminiń jarqyn juldyzy bolyp qala beredi. О́ıtkeni AQSh-taǵy kásipqoı bokstyń jankúıerler bazasyn meksıkalyqtar quraıdy. Olar boksshy 2-3 ret qatarynan jeńilmeıinshe shyn myqtydan úmitin úzbeıdi. Aldaǵy shaıqasta Gennadıı Golovkın Saýlden aılasyn asyrsa, oǵan úlken psıhologııalyq soqqy bolary anyq. Biraq Golovkın ony jeńe ala ma? Áńgime sonda. Kim bilsin?! Al Meksıka uly tarıhtyń jańa paraqtaryn jazýǵa tastúıin daıyn sııaqty... Áıtse de qazaqstandyq boksshy onyń josparyn buzady degenge sengimiz keledi... Alvarestiń jaqynda ǵana jeńilgenin eskersek, Golovkınniń bapkeri Djonatan Benkstiń sol shaıqastan qorytyndy shyǵarýy múmkin ekenin paıymdasaq, jeńiske jetýge múmkindik bar ekenin túsine túsemiz. Al qalǵanyn ýaqyt kórsetedi...

Sońǵy jańalyqtar

Búgin 3 qalada aýa sapasy nasharlaıdy

Aýa raıy • Búgin, 09:38

Uqsas jańalyqtar