Qytaı memlekettik qyzmette Qazaqstanmen yntymaqtas bolýǵa múddeli

Budan buryn Qytaıdyń memlekettik qyzmetshiler ókilderiniń elimizde resmı saparmen júrgenin habarlaǵanbyz. Adamı resýrstar jáne áleýmettik qamsyzdandyrý mınıstriniń orynbasary Iаn Shısıý bastaǵan sol delegasııa músheleri keshe QR Prezıdenti janyndaǵy Memlekettik basqarý akademııasynda bolyp, Qazaqstan memlekettik qyzmetshileriniń «A» korpýsyn qalyptastyrýdaǵy tájirıbesimen tanysýdy jalǵastyrdy. Kezdesý barysynda Qytaı vıse-mınıstri Iаn Shısıý óz elin­degi memlekettik qyz­met refor­masynyń negizgi aspektilerine toqtalyp ótip, bul salada ózderine Qazaqstannyń ozyq tájirıbesiniń qajet ekenin tilge tıek etti. «Qytaı Astanadaǵy mem­le­kettik qyzmet salasyndaǵy aımaq­tyq habtyń qurylýyna qol­daý bildirip, ákimshilik memle­kettik qyzmetshilerdiń «A» bas­qarý korpýsyn qalyptastyrý tájirıbesine qyzyǵýshylyq tanytady», – dedi ol QR Prezıdenti janyndaǵy Memlekettik basqarý akademııasynda stýdentter men oqytýshylarǵa arnap ótkizgen dárisi kezinde. Budan ári Iаn Shısıý myrza bizdiń elimizde qurylǵan aımaqtyq hab týraly óz oılaryn ortaǵa saldy. «Qazaqstannyń  bastamasymen memlekettik qyzmet salasynda aımaqtyq hab qurylǵanyn bilemiz. Biz ony tolyq qoldaımyz. Aımaqtyq hab – kóptegen elderdiń melekettik qyz­met salasynda tájirıbe men bilim, aqparat almasyp, ynty­maqtasatyn biregeı alańy. Oǵan qosa bul ıdeıany Qazaqstan kóterip, ortalyq osynda ornalasty. Qazaqstan – bizdiń jaqsy kórshimiz ári strategııalyq seriktesimiz. Iаǵnı mańyzdy baǵyttyń mańyzdy mehanızmderi kórshi ári seriktes elde júzege asyp otyr. Sondyqtan,  habtyń jumysyna, osy saladaǵy is-sharalarǵa jan-jaqty qoldaý kórsetýimizge tolyq negiz bar», – degendi aıtty ol. Onyń aıtýynsha, aımaqtyq habty damytýdyń orasan áleýeti de zor. «Biz muny ózimiz úshin asa kerekti tájirıbe dep sanaımyz, – dedi Qytaı vıse-mınıstri sosyn. – Qytaıda ákimshilik memlekettik qyzmetshiler joǵary basqarý, orta jáne tómengi laýazymdar bolyp úshke bólinedi. Bizde kadrlardy qyzmetke qoıýda tapsyrma boıynsha tikeleı taǵaıyndaý, konkýrs boıynsha tańdaý jáne saılaý dep atalatyn úsh túrli jolmen júrgiziledi. Endi Qazaqstan tájirıbesin de qoldanýdyń múm­kin­dikteri týyp otyr», – dep atap ótti Iаn Shısıý. Mártebeli meıman «A» korpýsy týraly da óte jaqsy pikirler bildirdi. «Qazaqstannyń memlekettik qyzmet reformasynyń ekinshi kezeńinde «A» korpýsyn qurǵanyn bilemiz. Bul – biz úshin paıdaly ári jaqsy tájirıbe. Qazaqstanda memlekettik qyzmetkerlerdi saıası jáne ákimshilik dep bólý álemniń kóptegen elderindegi tájirıbege saı. Ákimshilik memlekettik qyz­met­kerler «A» jáne «B» korpýs­taryna toptastyrylyp otyr. Munyń kadr tańdaý men tárbıe­leý­degi artyqshylyqtary men tá­limdi jaqtary óte kóp», – degen qo­rytyndy jasady Qytaı vıse-mınıstri. Kezdesý sońynda Iаn Shısıý myrza jınalǵandardyń suraq­taryna jaýap berdi. Serik PIRNAZAR, «Egemen Qazaqstan».