Bilim • 29 Maýsym, 2022

Stýdentter ara baǵyp júr

Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń ǵalymdary eki jyldan beri bal arasy sharýashylyǵyn damytý jóninde jańa jobany qolǵa alǵan bolatyn.

Qazbek QUTTYMURATULY

«Batys Qazaqstanda bal arasy sharýashylyǵyn damytý jobasy eki jylda aıtarlyqtaı nátıje kórsetti», deıdi mamandar.

Jáńgir han ýnıversıtetiniń rektory, ǵylym doktory, akademık Asqar Námetovtiń bastamasymen qolǵa alynǵan jobaǵa ýnıversıtet quramyndaǵy «Veterınarlyq medısına jáne mal sharýashylyǵy» ınstıtýtynyń aǵa oqytýshylary Gúldana Idrısova men Berik Satybaev jetekshi bolyp bekitilgen edi. 2020 jyly jeke qarajatqa bal arasynyń 10 uıasyn satyp alǵan ýnıversıtet basshylyǵy omartalardy «Zolotoı ýleı» sharýa qojalyǵynyń alqabyna arnaıy kelisimshart boıynsha ornalastyrǵan. Sóıtip, qojalyq ıesi Sergeı Krıvobokovpen birge ara sharýashylyǵymen aınalysatyn mekeme-uıymdarmen áriptestik baılanys ornatylyp, qyzmet aıasyn odan ári keńeıtý jumystary júrgizilýde.

– Bıyl úshinshi jyl qatarynan bizdiń omartamyzda «Ekologııa», «Veterınarlyq medısına» jáne «Veterınarlyq sanıtarııa» mamandyǵy boıynsha bilim alatyn stýdentter tájirıbelik mashyqtan ótýde. Munda olar ara sharýashylyǵyna kirispe, bal ónimderin alýdyń kezeńderin ıgerip, aranyń aýrýlarymen jáne onyń zııankesterimen kúresý joldaryn meńgeredi, – dedi Berik Ǵarıpollauly.

Gúldana Zeınollaqyzynyń aıtýynsha, bal aralary sharýashylyǵynda ázirge tek qana bal alynyp jatyr eken.

– Ár maýsymda bir ara uıasynan 15 kıloǵa deıin bal alynady. Árıne, ónim kólemi aýa raıyna baılanysty ózgerýi múmkin, – deıdi ǵalym.

Sharýashylyq basynda bal aralarynyń tylsym qupııasyna qanyǵyp júrgen stýdentter osy jobaǵa qyzyǵýshylyq tanytyp, jańa jobalar jasaqtap, granttyq qarjylandyrý baıqaýlaryna usyna bastaǵan. Sonymen qatar joba jetekshileri Berik Satybaev pen Gúldana Idrısova Reseıde biliktilik kýrstarynan ótip, túrli granttyq baıqaýlarǵa qatysyp júr eken.

Búginde BQATÝ ǵalymdary jergilikti ákimdikke bal arasy sharýashylyǵyn damytýdyń 2026 jylǵa deıingi tujyrymdamasyn daıyndaýǵa kómektesken. Qazaqstan omartashylarynyń «Bal-ara» atty ulttyq odaǵymen de yntymaqtastyq memorandýmy jasalǵan. Sondaı-aq halyqaralyq deńgeıdegi ǵylymı-zertteý ınstıtýttarymen de kelisimsharttar túzilgen. Mundaı áriptestik baılanys ara sharýashylyǵy bazasyn keńeıtýge, damytýǵa septigin tıgizeri anyq. Sonymen qatar ýnıversıtettegi «Qaıta óńdeý óndiristeriniń tehnologııasy» joǵary mektebimen birlese bal arasy ónimderin daıyndaý jobalary ázirlengen.

Sońǵy jańalyq – bal arasynyń tuqymyn jaqsartý úshin jaqynda Reseıden analyq ara satyp alynypty. Ol kúnine 500-den 2 myńǵa deıin jumyrtqa salady. 18 kúnnen keıin ol jumyrtqalardan ara shyǵa bastaıdy.

Batys Qazaqstan oblysy

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz