Ańyzdar aqıqatqa aınalady

Aty ańyzǵa aınalǵan «La Skala» sahnasynda óner kórsetý opera ánshileri úshin eń bıik shyń desek, sol qasıetti óner oshaǵynyń keremetin Italııaǵa at arytyp barmaı-aq tamashalaý múmkindigine ıe bolyp otyrǵan elordalyqtar qandaı baqytty. «Astana Opera» memlekettik opera jáne balet teatry tarıhta alǵash ret «La Skala» teatrymen birge «Toska» operasynyń premerasyn usynbaq. Qoıylym mamyrajaı mamyrdyń 9-y, 11-i men 12-si kúnderi ótedi dep kútilýde. «Toska» operasy «La Ska­la» teatrynyń túpnusqalyq qoıylymynyń kóshirmesi bolyp tabylady. Aıta ketý kerek, mundaǵy joǵary sapaly materıaldardan ázirlengen dekorasııa­lar men kostıýmder mılandyq teatrdyń sheberhanalarynda jasalýymen asa úzdik sanalady. Elorda turǵyndary men qonaqtary operanyń otanynda dúnıege kelgen tyń týyndyny jaqynnan tamashalap, umytylmas áserge bólenbek. Pavarottı, Domıngo, Kar­rerastan keıingi tórtinshi tenor atanýǵa nıetti, óneri óte joǵary suranysqa ıe Marselo Alvares Kavaradossıdi, ıtalıandyq tanymal sopranonyń biri Anna Pırossı Toskany, ataqty barıton Paolo Sılverıdiń shákirti Alberto Mastromarıno Skarpııany somdaıtyn ǵajaıyp jobanyń ereksheligi – odan jergilikti jerdegi talanttar da tys qalyp qoımaıtyn túri bar. Álemdik deńgeıdegi maestro Danıel Oren dırıjerlik etetin, rejısser Lýka Ronkonı sah­nalaǵan shoqtyǵy bıik qoıylym teatr álemindegi aıtýly oqıǵanyń birine jatýda. Bir ǵasyrdan astam ýaqyt buryn dúnıege kelgen týyndy dúnıejúzi teatrlary repertýarlaryndaǵy eń jıi oryndalatyn úzdik operanyń biri desek, atalmysh mýzykalyq shyǵarmanyń taǵy bir qyry – mundaǵy áýen birtalaı kınofılmderde shyrqalǵandyqtan kópshilikke asa tańsyq bola qoıady dep oılamaımyz. Oǵan qosa munyń jelisi operadaǵydaı dramatızmge, satqyndyqqa, ólim jazasynyń kórinisterine toly bolǵandyqtan, Dj. Pýchchınıdiń dramalyq operasynyń áserli kórinisteri jurtshylyqty basynan aıaǵyna deıin jipsiz baılap ustaryna senim mol. Margerıta Pallıdiń qushtar sezimmen jetkizetin dekorasııa­sy ótken júzjyldyqtyń tarıhı oqıǵasy bolyp sanalatyn Napoleon basqarǵan fransýz áskeriniń 1800 jyly Italııaǵa basyp kirgen kezin sýretteıdi. Vera Marzottyń nobaıymen ázirlengen kostıýmderdiń tarıhı naqyshy sol kezeńder sýretin aıshyqty kórsetýmen qatar, oqıǵany anyq ta dál beıneleýge qyzmet etedi. Jetiqara QOŃYR. ASTANA.