Oqıǵa • 01 Shilde, 2022

Almatyda qorshaýǵa órmelegen 8 jasar balany toq soqty

22 ret kórsetildi

Almatyda saıabaqta dostarymen oınap júrip qorshaýǵa órmelegen balany toq soqty. Qazir ol aýrýhanada jatyr, dep habarlaıdy Egemen.kz.

Qalalyq densaýlyq saqtaý basqarmasynyń málimetinshe, oqýshy aýrýhanaǵa aýyr halde jetkizilgen.

«Toqqa túsip qalǵan 2014 jyly týǵan A. esimdi bala jedel járdem brıgadasymen ortalyq balalar aýrýhanasyna jetkizildi. Dárigerler oqýshyǵa alǵashqy kómek kórsetip, birden kúıik bólimine jatqyzdy. Jaǵdaıy turaqty, ortasha aýyrlyqta. Protokol boıynsha em alyp jatyr», dep habarlady densaýlyq saqtaý basqarmasynan.

Belgili bolǵandaı, oqys oqıǵa Alataý aýdanynda bolǵan.

Segiz jasar bala jabdyqtalmaǵan saıabaqta dostarymen oınap júrip qorshaýǵa órmelegen kezde toq soqqan.

Alataý aýdany ákimdigindegiler oıyn alańqaıyn salý máselesi boıynsha jumys istelip jatqanyn aıtty.

«Saıabaqty «Bıýdjetke qatysý» baǵdarlamasy boıynsha jańartýdy qarastyryp jatyrmyz. Talap boıynsha, komıssııa qarap, sheshim qabyldaýy kerek. Sodan keıin turǵyndar oıyn alańyn salý jobasyna daýys beredi», dedi Almaty qalasy Alataý aýdany ákimdiginiń kommýnaldyq sharýashylyq bóliminiń meńgerýshisi Ertis Besirov.

Uqsas jańalyqtar