Altaıdaǵy bul alamanǵa Rústem Qaıyrtaıuly, Muhtar Nııazov, Erkebulan Qaınazarov, Aspanbek Shuǵataev syndy tanymal 16 aqyn qatysty. Jyr dodasyna Ulyqbek Esdáýlet, Kámel Júnistegi, Serik Qalıev, Dáýletkereı Kápuly, Almas Ahmetbek, Serik Qusanbaev qatarly sóz zergerleri qazylyq etti. Al aıtystyń tizginin Qazaqstan Respýblıkasynyń eńbek sińirgen qaıratkeri Júrsin Erman ustady.
– Bul aıtysty Altaıdyń atymtaı jomart azamattary uıymdastyryp, qarjylaı qoldaý kórsetip jatyr. Maqsatymyz – osyndaı tabıǵaty baı, sulý ólkeni ózge jurtqa tanystyrý, Katonqaraǵaı jeri týrızmniń tóri ekenin tanytý. Ár elden kelgen jyr júırikteri búgin osyny tilge tıek eteri sózsiz, – dep aıtystyń shymyldyǵyn ashty Júrsin Erman.
Aıtysty Shyǵys Qazaqstan oblysynyń aqyny Serik Qýanǵan men Ońtústik Qazaqstan oblysynyń aqyny Erkebulan Qaınazarov bastady. Kesek sóılep, kesimdi oı aıtyp júrgen aqyn Serik Qýanǵan jyryn nóserlete kele: «Táńir ózi tartýǵa berip turǵan, tabıǵat qushaǵyna engensińder, ulylyqty uqtyrǵan eldensińder, jumyr jerdiń betinde bar bolsa eger, jumaqta ómir súrgen sendersińder», dep bir qaıyrdy.
Áýelde «Altaıda halyqaralyq aıtys ótedi» degendi estigen jurt Katonqaraǵaı aýylynyń ortalyq alańynan tabylǵan. Ashyq aspan astynda ótip jatqan aıtystyń bir ereksheligi, kórermenge oryndyqty syǵymdalǵan (prestelgen) tórt buryshty shópten jasaǵan. Alǵashynda kózge oǵashtaý kóringenimen, jambastaı jatyp, aıtys kórýge óte qolaıly eken. Halyq eko-oryndyq dep ázildesip jatty.
Al aqyndardyń taǵy bir juby bolyp Zaısannyń jas bórisi Ardabek Aqbaba men mońǵolııalyq Serýen Ázimuly shyqty. Dese de, Altaıdy jyrlaýdan Ardabektiń asyp túskenin jyrǵa shóldegen halyq tóreshilerden buryn baıqady.
Aqyndardyń legi osylaı jalǵasyp jatty. Aspanbek Shuǵataevtyń da «Bir súıem jer bermegen babalardyń, súıegin Reseıge shashasyńdar» degendeı sózi de eldiń esinde qaldy. Sebebi Berelden tabylǵan saqtardyń súıegi, qundy jádigerlerdiń tabylǵanyn ǵana bilemiz de, qaıda, kimniń qolynda ketkenin bilmeımiz. Áıteýir Peterborda, zertteýde desedi. (Zertteý degendeı, munyń ózi zertteıtin taqyryp)
Altaıdy jyrlaýda qaı aqyn da tizgin tartar emes. Baıqaǵanymyz, Oralhan men Altaı egiz uǵymǵa aınalǵan. Qaı aqyn bolmasyn, jyrynyń sońyna Oralhannyń oıymen núkte qoıyp otyrdy.
Altaıdyń asqaq dalasyn taqyrypqa arqaý etken alǵashqy halyqaralyq aıtystyń jalpy júlde qory 20 mıllıon teńgeni qurap, bas júldege 5 mıllıon teńge tigildi. Utymdy oıymen oza shapqan zaısandyq aqyn Ardabek Aqbaba aıtystyń bas júldesin jeńip alyp, 5 mıllıon teńgeni qanjyǵasyna baılady. Osylaısha, halyqaralyq aıtysta jańa esim jurtqa tanylyp, myqtylardyń qataryn tolyqtyrdy. Al eki mıllıon teńgelik birinshi orynnyń syılyǵy qyzylordalyq aqyn Muhtar Nııazovqa buıyrdy. Bir mıllıon teńgeden júlde tigilgen eki ekinshi oryndy Rústem Qaıyrtaıuly men Erkebulan Qaınazarov enshiledi. Aıtystyń úshinshi ornyn ózbekstandyq Talǵat Orynbekov pen almatylyq Haziret Berdihan jeńip alyp, 500 myń teńgelik syıaqyǵa ıe boldy. Aıtysqa qatysqan ózge aqyndardyń da qorjyny bos qaıtqan joq.
Shyǵys Qazaqstan oblysy,
Katonqaraǵaı aýdany
