24 maýsym kúni О́skemende jeldiń ekpini 16 m/sek deıin jetip, qalanyń oıranyn shyǵardy. Aǵashtar tamyrymen opyrylyp, birneshe kólikti zaqymdady. Zaqymdady degenim, ber jaǵy. Áıtpese, jýan terek keıbir avtokólikterdi ortan belinen basyp qalyp, kúl-talqan etti. Ásirese, Gagarın býlvary, Sevastoplskaıa kósheleri turǵyndaryna qutqarýshylardyń kómegi qajet boldy. Al Gogol, Stahanovskaıa, Vınogradov, Qazaqstan, Býrov kósheleri, Shákárim dańǵyly boıyndaǵy qulaǵan aǵash, butalardy «Taza О́skemen» kásipornynyń qyzmetkerleri tez arada tazalap shyqty. Daýyldyń joıqyn bolǵany sondaı, elektr jelilerine deıin úzilip, tramvaılar tusalyp qalǵan. Bárinen buryn aıaldama pavılonynyń velosıpedpen ketip bara jatqan qyz balany basyp qalǵanyna turǵyndar narazy boldy. Dál osyndaı oqıǵa Gagarın býlvarynda da bolǵan. Áıteýir, abyroı bolǵanda balalar aman. Medısınalyq kómek kórsetilipti. Dese de aıaldama pavılonyn qabyldap alǵan quzyrly organdardyń salǵyrttyǵy úshin japa shekken 10 jasar búldirshinniń anasy Nazgúl Magzatova sotqa beremin dep otyr. Polısııaǵa aryzdanyp ta qoıǵan.
– Sol kúni polısııaǵa ótinish jazdym. Tirkeýden ótipti. Balamnyń jaǵdaıy jalpy jaqsy. Mıy shaıqalǵan, shoshynyp qalǵan. Qazir aýrýhanada jatyr. Keshe «Taza О́skemen» kásiporny shaqyrdy, bardym. Kerek jaǵdaıdy jasaımyz dep otyr. Biraq sotqa beremin. Sebebi kináliler jaýap berýge tıis. Keleside mundaı salǵyrttyq qaıtalanbasyn. Mysaly, arnaıy baryp, sol aıaldamany kórdim. Túbin betondap, myqtap bekitip qoıypty. Sony birden nege durys istemegen, – deıdi Nazgúl Magzatova.
Ras, sapasyz qurylys kóp bizde. Qarapaıym aıaldamanyń tórt sıraǵyn bekite almaǵan soń záýlim úılerge qaıdan qadaǵalaý bolsyn?! Turǵyn úı-kommýnaldyq sharýashylyǵy mamandarynyń pikirinshe, qatty jel saldarynan oryn alǵan oqıǵaǵa baılanysty tekserý júrgizilip, shalaǵaılyq tanytqan azamattar aıyptalatyn kórinedi.
Negizi áý bastan tııanaqty atqarylýy kerek edi. Bireý japa shekpeıinshe nege selt etpeımiz, túsiniksiz. Bir kúni osy salǵyrttyq san soqtyryp júrmese etti. Aıtqandaı, TJD-siz daýyldy eskertý týraly «Dármen» mobıldi qosymshasynan bile alasyz. Eger daýyl bolatyn bolsa, qaýipsizdik erejelerin saqtańyz. Qudaı saqtasyn, tótenshe jaǵdaı oryn ala qalsa, 112 nómiri boıynsha habarlańyz.
О́skemen
