Bul isti de eńseretinimizge senimdimin

Mysaly, bir turǵynnyń bir kúngi qaldyǵyn 50 teńge dep-aq baǵalaıyq ta, osyny elimizdegi barlyq turǵyn sanyna kóbeıteıik. Nátıjesi 1 mıllıard teńgege jaqyndap qalady eken. Bul – árqaısysy  10 mıllıon teńge turatyn 100 baspananyń quny. Al biz bolsaq, kúnine osynshama paıda tabýdyń ornyna, qoqysqa belshemizden batyp jatyrmyz. Bizde Ekologııa mınıstrliginiń bar-joǵy belgisiz. Ne istep, ne qoıyp otyrǵany bir Qudaıǵa ǵana aıan. Eger mınıstrlikter óz betimen sheteldik ozyq tájirıbelerdi zerttemese, qoldanbasa, ondaı qoly qysqa vedomstvolardyń ne keregi bar?

Búginde dúnıe júzinde turmystyq qaldyqtardy tabysty salaǵa aınaldyrýdyń bir ǵana joly bar ekeni belgili. Ol – qaldyqtardy úıden suryptap shyǵarý. Bul iste biz de kósh sońynda qalmaýymyz kerek qoı. Ol úshin Japonııa sııaqty damyǵan elderden, Eýroodaq elderinen, tipti alystaǵy Amerıkadan úlgi alaıyq. Bastapqyda árbir qaldyq jınaıtyn orynǵa baqylaýshy qoıaıyq dep aıtaıyn dedim de, bul raıymnan birden qaıttym. О́ıtkeni munym ár kósheniń qıylysyna bir-bir polısııa qyzmetkerinen qoıý kerek degen sııaqty orynsyz usynys bolyp shyǵady eken. Odan da qaldyqty qalaı bólip jınaý keregi týraly nusqaýlyqtar, jón silteıtin broshıýralar taratylsa durys bolatyn sekildi. Qulaq aspaıtyn qyńyrlar men qyrsyqtarǵa yńǵaıyn taýyp aıyppul salatyn tetik qarastyrylsa nesi aıyp?!

Jalpy alǵanda, qaldyqtarǵa suranys ózimizde de, shetelderde de jetkilikti. Sýǵa túspeı júzýdi úırenbeımiz degendeı, barshamyz bir kisideı jumylyp qolǵa alsaq, áýelde qıyn kóriner bul sharýany da eńseretinimizge senimdimin.

S.BAQTYǴALIEV, 

zeınetker

ORAL