«Ken ornyndaǵy jarylystan eki adam qaza tapty. Biri oqıǵa ornynda, ekinshisi «Teńizshevroıl» JShS-niń medısınalyq klınıkasynda kóz jumdy. Jaraqat alǵandardyń biri – 1996 jylǵy jigit eki saǵattyń ishinde jedel oblystyq aýrýhanaǵa jetkizildi. Onyń ishki aǵzasy zaqymdanǵan. Dárigerler naýqastyń baýyry men búıregine tigý arqyly qalpyna keltirý otasyn júrgizdi. Sondaı-aq naýqastyń ót joly úzilgeni belgili boldy. Omyrtqasy men birneshe qabyrǵasy synǵan. Qazir naýqastyń jaǵdaıy aýyr. Dárigerler naýqastyń jaǵdaıyn únemi baqylaýda ustap otyr», dedi oblystyq densaýlyq saqtaý basqarmasynyń basshysy Ashan Baıdýalıev.
Onyń aıtýyna qaraǵanda, jaraqat alǵannyń ekinshisi – 1998 jylǵy jumysshy. Oǵan alǵashqy psıhologııalyq kómek kórsetilgen. Qazir zardap shekken jumysshy esin jıyp, óz-ózine kele bastaǵan. Al, zardap shekken úshinshi jumysshy Jylyoı aýdandyq ortalyq aýrýhanasyna jetkizilgen. Ol óziniń qolhatymen úıine jiberilgen.
«Zardap shekken jumysshy kompıýterlik tomografııaǵa, rentgenge túsirildi. Onyń azdaǵan jaraqaty bolǵan. Qazir jaǵdaıy qanaǵattanarlyq dep baǵalanyp otyr», dep málim etti Ashan Baıdýálıev.
Eske sala keteıik, 6 shildede jergilikti ýaqytpen saǵat 09:55 shamasynda teńiz ken ornynda jarylys boldy. Ken ornyndaǵy atmosferalyq gazy bar qubyrda gıdrotest júrgizilip, qysymǵa tótep bere almaǵan qubyr jarylyp ketken.
Jarylystyń saldarynan eki jumysshy kóz jumdy. Al, úsh adam ártúrli dene jaraqatyn aldy. Olardyń ekeýi aýrýhanaǵa jetkizilgen bolatyn.
