Asa baı altyn buıymdarmen kómkerilgen sarmat hanshaıymynyń saltanatty túr-tulǵasyn belgili restavrator Qyrym Altynbekov qalpyna keltirip, elordadaǵy Ulttyq mýzeı men Oral oblystyq tarıhı-ólketaný mýzeıine syıǵa tartqan edi. Endi, mine, Taqsaı hanshaıymynyń taǵy bir kóshirmesi qasıetti Túrkistan tórinen oryn aldy. Qazaqstan Respýblıkasy Premer-Mınıstriniń orynbasary Eraly Toǵjanovtyń tóraǵalyǵymen Batys Qazaqstan oblysy ákimdigi Taqsaı hanshaıymynyń kóshirmesin daıyndap, Túrkistan oblystyq «Uly dala eli» ortalyǵyna syıǵa tartty. Tamasha tartý Batys Qazaqstan oblystyq tarıhı-ólketaný mýzeıiniń uıymdastyrýymen ótken «Tarıhy – tereń Aqjaıyq, Taqsaı hanshaıymy» atty kórmeniń ashylýy kezinde jasaldy.
Aıta keteıik, Taqsaı hanshaıymy – Qazaqstanda tabylǵan 4 altyn adamnyń biri. Qazaqstannyń Jalpyulttyq qasıetti nysanyna aınalǵan erekshe jádigerdi, Aq Jaıyq óńirindegi mýzeı qory týyndylaryn keńinen nasıhattaý, rýhanı qundylyqty jańǵyrtyp, Túrkistan qalasynyń turǵyndary men qonaqtaryna mádenı-rýhanı demalys syılaý maqsatynda uıymdastyrylǵan is-sharaǵa túrkistandyqtar erekshe rıza boldy.
Batys Qazaqstan jáne Túrkistan oblysy mýzeıleriniń arasyndaǵy yntymaqtastyqty arttyrý, ózara baılanysty nyǵaıtýǵa yqpal etetin atalǵan kórmeniń saltanatty ashylýyna Batys Qazaqstan oblysy mádenıet basqarmasynyń basshysy Saıran Dúısenov, Batys Qazaqstan oblystyq tarıhı ólketaný mýzeıiniń dırektory Mırbolat Ersaev qatysyp sóz sóıledi.
– Taqsaı hanshaıymy – Batys Qazaqstan ólkesiniń bir jaýhary edi. Búgin kıeli Túrkistan oblysyna jańa kóshirmeni tapsyryp otyrmyz. Altyn hanshaıymdy kózimen kórip, tamashalaý baqyty elimizde úsh-aq qala turǵyndaryna buıyrǵan. Bolashaqta qos oblystyń mýzeıleri arasyndaǵy yntymaqtastyq budan da arta beretinine senemin. Jas urpaqqa maqtan eterlik jaqsy jádigerimiz kóbeıe bergeı, – deıdi Saıran Temirǵalıuly.
Batys Qazaqstan oblysy
