«Qashaǵannan» tartylǵan qubyr tolyq aýystyrylady

 

ATYRAÝ. 29 sáýir. «Qashaǵan» ken ornynan «Bolashaq» munaı men gazdy keshendi daıyndaý qondyrǵysyna deıin tartylǵan munaı jáne gaz qubyryn tolyqtaı aýystyrý josparlanýda. Bul týraly NKOK kompanııasynyń baspasóz qyzmeti habarlady. О́tken jyldyń 11 qyrkúıeginde «Qashaǵan» ken ornynan munaı óndirý bastalǵan edi.  Alaıda, 24 qyrkúıekte «D» aralynan «Bolashaq» zaýytyna tartylǵan jerústi qubyrynda gaz kóleminiń kemýi anyqtaldy. Osyǵan baılanysty ken ornyn paıdalaný jumystary ýaqytsha toqtatyldy. Erejelerge sáıkes, Tótenshe jaǵdaılar departamenti men tıisti baqylaýshy organdarǵa oryn alǵan oqıǵa jóninde dereý habar berildi. Qubyrǵa baratyn jol ashylyp, qubyrdyń tıisti jikteri aýystyryldy. О́ndiris qaıta jańǵyrtyldy, biraq, 9 qazanda kemý jaǵdaıy anyqtalǵannan keıin óndiris qaıta toqtatyldy. Aqaýly qubyrlar jasandy araldan («D» araly) «Bolashaq» munaı men gazdy keshendi daıyndaý qondyrǵysyna deıin munaı men gazdy tasymaldaýǵa arnalǵan. Árbir qubyrdyń uzyndyǵy shamamen 90 shaqyrymdy, dıametri 28 dıýımdi quraıdy. Búgingi tańǵa deıin jasalǵan zertteýlerdiń nátıjelerine súıene otyryp, aǵymdaǵy baǵalaýǵa sáıkes munaı qubyry da, gaz qubyry da tolyqtaı aýystyrýdy qajet etetindigi anyqtalyp otyr. Bul zertteý jumystary aıaqtalǵasyn rastaýǵa jatady. Operator qazirgi tańda qubyrdy tolyqtaı aýystyrý josparyn ázirlep jatyr. Ony bıylǵy jyldyń ortasyna qaraı aıaqtaý josparlanýda. Bul jospar jabdyqtaýshylar men merdigerlerdi tańdaý jónindegi tenderlerdi ótkizýdi, qolda bar negizgi qural-jabdyqty paıdalana otyryp, materıaldyń spesıfıkasııalaryn anyqtaýdy qamtıdy. Mundaǵy maqsat – óndiristi  yqtımal túrde meılinshe tezirek jańǵyrtýdy esepke ala otyryp, qubyrlardy aýystyrýdyń eń ońtaıly josparyn ázirleý. Aldyn-ala saqtyq sharasy retinde jáne ýaqytty joǵaltpaý úshin konsorsıým qubyr segmentterin satyp alý úshin tender ótkizýge kirisip ketti. Joldasbek Shópeǵul. Derekkóz: NKOK kompanııasynyń baspasóz qyzmeti. Foto: kapital.kz.