«Biz bir apta buryn elimizdiń kólik-tranzıt áleýetin damytý máseleleri týraly arnaıy jıyn ótkizdik. Búgin avtojol ınfraqurylymy salasyndaǵy túıtkilderge erekshe toqtalǵym keledi. Bıyl 11 myńnan astam shaqyrym jolǵa ártúrli jóndeý jumystary júrgiziledi. Buǵan 600 mıllıard teńgeden astam qarjy bólindi. Jóndeý jumystaryn sozbalańǵa salýǵa bolmaıdy. Jobalardy júzege asyrý barysyn qatań baqylaýǵa alý qajet. Joldyń sapasyna aıryqsha nazar aýdarý kerek. Elimizdiń joldary nashar ekeni jáne jol qurylysy salasyn jemqorlyq jaılaǵany eshkimge jasyryn emes», dep atap óti Prezıdent.
Memleket basshysy óz sózinde otandyq óndiristiń áleýeti tolyq qoldanylmaıtynyn aıta ketti.
«Qazaqstanda jol qurylysyna qajetti materıaldyń bári bar. Biraq, otandyq óndiristiń áleýeti tolyq qoldanylmaıdy. Muny, tipti, qoldan jasalǵan tapshylyq deýge bolady. Mysaly, elimizde bıtým óndiretin úsh zaýyt bar. Soǵan qaramastan, 200 myń tonna bıtým jetispeıdi. Qurylys qarqyndy júrgen kezde onyń baǵasy úsh ese, ıaǵnı bir tonnasy 90 myńnan 250 myń teńgege deıin qymbattaıdy. Úkimetke jol qurylysyna qajetti resýrstardy óndirý jáne tutyný barysyn muqııat saralaýdy tapsyramyn. Sonyń negizinde qurylys materıaldaryn shyǵaratyn jańa kásiporyndar ashý qajet. Al, jumys istep turǵan nysandardy jańǵyrtý kerek», dedi Qasym-Jomart Toqaev óz sózinde.
Prezıdent memlekettik satyp alý konkýrsyna otandyq kompanııalar belsene qatyspaıtynyn synǵa aldy.
«2019 jyldan beri avtojol salasynda quny 1,5 trıllıon teńge bolatyn memlekettik kelisim-sharttar jasaldy. Sonyń 40 paıyzyn sheteldikterdiń qatysy bar kompanııalar utyp alǵan. Biz sheteldik seriktesterimizge qoldaý kórsetemiz. Olar úshin naryq árdaıym ashyq bolady. Biraq, otandyq kompanııalarymyz belsene qatyspaıdy. Úkimet jergilikti kásiporyndar úshin básekeli orta qalyptastyrýy kerek. Keıbir iri kompanııalardyń eńbek jáne materıaldyq resýrstary jetkiliksiz. Soǵan qaramastan, olar tenderdi utyp alyp, jumysty merdigerge ysyra salady. Osyndaı ahýal jylda qaıtalanady. Tipti, jumystyń 100 paıyzy basqa merdigerge tapsyrylǵany jóninde málimetter bar», deıdi Prezıdent.
