Saryaǵash aýdandyq polısııa bólimine jergilikti turǵyn bir bas jylqysynyń jaıylymnan urlanǵany boıynsha shaǵym túsirgen. Atalǵan jaıt QR QK-niń 188-1-baby (Mal urlyǵy) boıynsha tirkeýge alyndy. Habarlama alysymen saryaǵashtyq tártip saqshylarynan jedel-tergeý toby quryldy.
Polıseıler óz tájirıbelerine súıene otyryp, urylardyń izine túsý úshin shuǵyl jáne josparlanǵan áreketterdi júzege asyrdy. Mal jaıylymdaryna shyǵyp, tııanaqty tekserýlerdi uıymdastyrdy. Kórgen-bilgenderden jaýap alyp, jan-jaqty surastyrý jumystaryn júrgizdi.
Nátıjesinde, polısııa qyzmetkerleri kúdikti retinde О́zbekstan azamatyn ustady. Tekserý kezinde kúdikti jas jigit ózimen birge mal urlyǵymen aınalysqan, ıaǵnı, qylmysty uıymdastyrýshy taǵy eki kúdiktiniń bar ekenin aıtty. Osydan soń polıseıler qalǵan azamattardy izdestirý jumystaryn júrgizdi. Olardy kóp uzamaı qolǵa túsirdi.
Jalpy, ustalǵan azamattardyń ekeýi О́zbekstan Respýblıkasynyń azamaty bolsa, bir azamat jergilikti turǵyn bolyp shyqty. Tııanaqty tekserý men zerdeleý barysynda osy ustalǵandardyń mal urlyǵynyń 16 jaıtyna qatysy bary anyqtaldy. Al shyǵyn kólemi 10 mıllıon teńgeden joǵary ekeni belgili boldy.
Anyqtalǵandaı, kúdiktiler qylmys jasaý barysynda óz rólderin aldyn ala jospar boıynsha oryndaǵan. Mysaly, basty kúdikti mal jaıylymynda qaraýsyz júrgen jylqy, sıyrlardy baıqaǵan boıda júk kóligine tıep otyrǵan. Sodan sybaılasy ekeýi urlanǵan maldardy satyp alýshylarǵa, qasapshyǵa arzan baǵada ótkizgen. Olar urlaǵan oljalaryn Gazel kóligimen tasymaldaǵan.
Polısııa qyzmetkerleri aıǵaqty zat retinde kúdiktilerden Gazel kóligi men eki bas jylqyny tárkilep aldy. Dál qazirgi ýaqytta kúdiktiler qamaýǵa alynyp, sotqa deıingi tergeý amaldary júrgizilýde. Tártip saqshylary ustalǵandardyń basqa da qylmystarǵa qatystylyǵyn tekserip jatyr.
