Hans-Dıter 1965 jyldyń 24 aqpanynda nemistiń Gaıdelberg qalasynda dúnıege keldi. Áý basta túrli klýbtardyń sapynda óner kórsetken ol 20 jasynda Mıýnhenniń «Bavarııasynyń» jeıdesin kıdi. Biraz ýaqyt Lotar Matteýs pen Mıhael Rýmmenıgeniń kóleńkesinde júrgen jartylaı qorǵaýshy keıinnen negizgi quramǵa qabyldandy. «Bavarııamen» birge Flık Germanııa chempıonatynda tórt ret top jaryp, el kýbogyn ıelendi. Toqsanynshy jyldardyń basynda ol «Kelnniń» sapynda oınady.
Eski jaraqaty jıi mazalaǵannan keıin Hans-Dıter úlken sportpen qoshtasyp, jattyqtyrýshylyqtyń qamytyn kıdi. Túrli komandalardy jattyqtyryp, 2019 jyly áıgili mıýnhendik klýbtyń tizginin ustady. Atalǵan mamannyń jetekshiligimen «Bavarııa» eki ret el chempıony atanyp, kýbok pen sýperkýbokty ıelendi. 2020 jyly ÝEFA chempıondar lıagasy, ÝEFA sýperkýbogy jáne klýbtyq álem chempıonatynda bas júldeni oljalady. Bul kúnderi ulttyq quramany jattyqtyryp júrgen 57 jastaǵy Hans-Dıter Flık jylyna 6,5 mıllıon eýro kóleminde jalaqy alady.
Ekinshi orynda – 51 jastaǵy Garet Saýtgeıt. Kezinde ol APL-daǵy «Krıstal-Pelas», «Aston Vılla», «Mıdlsbronyń» jáne 1995-2004 jyldar aralyǵynda Anglııanyń ulttyq quramasynyń tas-qamal qorǵaýshysy boldy. 2016 jyldan beri óz eliniń bas komandasyn jattyqtyryp júrgen 51 jastaǵy Saýtgeıt ár jyl saıyn 5,8 mıllıon eýrony qaltasyna basýda.
Úshinshi oryndy dańqty Dıde Desham ıelenýde. Jalyndap turǵan shaǵynda ol Fransııanyń «Nant», «Marsel», «Bordo», Italııanyń «Iýventýs», Anglııanyń «Chelsı» jáne Ispanııanyń «Valensııasynda» jasyndaı jarqyldady. Amplýasy – jartylaı qorǵaýshy. О́z eliniń ulttyq quramasy sapynda 1998 jyly álem chempıony jáne 2000 jyly Eýropa chempıony atandy. Qart qurlyqtyń birqatar beldi klýbtaryn jattyqtyrǵan ol kóptegen bıik belesti baǵyndyrdy. Deshamnyń jetekshiligimen fransııalyq fýtbolshylar 2016 jyly Eýropa birinshiliginiń kúmis júldegeri, 2018 jyly álem chempıony 2021 jyly Ulttar lıgasynyń jeńimpazy degen asa mártebeli ataqtarǵa qol jetkizdi. 53 jastaǵy Dıdeniń jalaqysy 3,8 mıllon eýro shamasynda.
Sondaı-aq TOP-10 aýqatty bas jattyqtyrýshylar qatarynda Tıte (Brazılııa. 3,6 mln eýro), Lýı van Gal (Nıderland. 2,9 mln eýro), Herardo Martıno (Meksıka. 2,9 mln eýro), Lıonel Skalonı (Argentına 2,6 mln eýro), Felıks Sanches Bas (Qatar. 2,4 mln eýro), Fernando Santýsh (Portýgalııa. 2,25 mln eýro) jáne Mýrat Iаkın (Shveısarııa. 1,6 mln eýro) syndy maıtalman mamandar bar. Al álem chempıonatyna qatysýshylar arasynda eń az jalaqy alatyn Jálel Qadrı eken. 50 jastaǵy Týnıs quramasynyń bas jattyqtyrýshysy jylyna bar bolǵany 130 myń eýro alady.
